Չունենք սպառազինություն, բայց ունենք հարուստ ավանակներ

«Ես որևէ սխալ չեմ արել, որի համար ամաչեմ»: Երեկ Ծիծեռնակաբերդի հուշահամալիրում լրագրողների հետ զրույցում ասել է երկրի վարչապետ Հովիկ Աբրահամյանը՝ հավելելով, որ եթե հարկ լինի կվաճառի իր առանձնատունը և գումարները կուղղի բանակի սպառազինմանը: Մևնույն ժամանակ, հավանաբար ունեզրկելուց իրեն ապահովագրելու համար՝ վարչապետը հայտարարել է, թե «…բայց մեր պետությունը սպառազինության հետ կապված ֆինանսական խնդիր չունի»:

«Սրա պատասխանը միանշանակ է և այն չի վերաբերում միայն վարչապետին»: Newspress.am-ի հետ զրույցում, արձագանքելով Հովիկ Աբրահամյանի հայտարարությանը, իր տեսակետը հայտնեց «Ղարաբաղ» կոմիտեի նախկին անդամ Աշոտ Մանուչարյանը:

Նրա որակմամբ՝ երկրում ստեղծված համակարգը բացարձակ կառուցված է երկրի կողոպուտի վրա` հարստացման նպատակով:

«Բոլորին թվում է, որ մարդ պետք է անպատճառ հարստանա ցանկացած ճանապարհով` հատկապես կողոպուտի: Ու եթե մենք հիմա որոշում ենք, որ այդպես չպետք է լինի՝ վարչապետն էլ պետք է համոզված լինի, որ էն փողերը, որ վերադարձնելու է երկրին, վերադարձնում է հենց երկրին, այլ ոչ թե ձեզ և ինձ, որ մի հատ էլ մենք կողոպուտի մասնակից դառնանք»,- նկատեց Մանուչարյանը՝ հավելելով, որ եթե մենք որոշում ենք, որ ապրելու ենք նորմալ հանգիստ խաղաղ կյանքով, առանց պերճ կյանքի և այլ բաների ձգտելու, իսկ մեր համեստ կյանքից դուրս գումարներն ուղարկելու ենք մեր երկրի խաղաղ կյանքի կայունացմանը, ապա նշանակում է, որ մեր պահանջները երկրի վարչապետին և մյուսներին՝ բացարձակ օրինական են:

Այսօր, Մանուչարյանի գնահատմամբ, հարուստ մարդը բացարձակ խայտառակություն է, բացարձակ անբարոյականություն:

«Էնտեղ զոհվում է երեխան որովհետև չունի բաճկոն, զենք կամ չգիտես ինչ… որովհետև մենք այստեղ չունենք բարձրակարգ գիտություն, բայց փոխարենը ունենք մի ավանակ, անգամ եթե նա օրինական ավանակ է, որն ունի հարյուր հարկանի շենք՝ խայտառակություն է»,-ընդգծեց «Ղարաբաղ» կոմիտեի նախկին անդամը:

Նա նկատեց, որ մեր ժողովուրդը, հազարամյակներ շարունակ ապրել է և ունեցել հարուստ, բայց համեստ ապրող մարդ, ունեցել է կոթողներ և նվաճումներ:

«Պետք է վերադառնանք այդ կյանքին, իսկ այն կյանքը, որ եկավ մեր գլխին, որպես ավանակների կյանք, թողենք ավանակներին»,-եզրափակեց Մանուչարյանը: