Պաշտոնակությունը քիչ է, «պռոմըխների» համար գլխատում են. Վարդանովը` գեներալների պաշտոնանկության մասին

«Ստալինը իր ժամանակին պալկովնիկ Պավլովին, աշխատանքում թերացման համար, գնդակահարել է տվել»:

Newspress.am-ի հետ զրույցում ասաց Կենտրոնական հրամանատարության հետախույզ, դիվերսիոն հատուկ նշանակության ջոկատի հիմնադիր հրամանատար Վովա Վարդանովը՝ անդրադառնալով ՀՀ նախագահ Սերժ Սարգսյանի կողմից Զինուժում կատարած պաշտոնանկություններին:

Նախկին հետախույզի դիտարկմամբ, երբ աշխատանքում թերացումների համար գտնում են մեղավորներին, ովքեր աշխատել չգիտեն, կամ չեն ցանկացել կամ իրենց աշխատանքով չեն փորձել ծառայել երկրին՝ նրանց ազատելը ճիշտ որոշում է:

«Հետախոզությունը 100 տոկոս տեղյակ էր, որ ինչ-որ առաջխաղացում կա: էդ ամեն ինչը պետք է զեկուցվեր և՛ գլխավոր հրամանատարությանը, և՛ ռազմաքաղաքական ղեկավարությանը, պետք է ներկայացվեր վտանգների մասին, դա հետախուզության վարչության գործն էր: Ու, եթե հետախուզության վարչության անձնակազմը տեղյակ է եղել շարքային հետախույզից մինչև վարչության պետ, և հետախուզությունը մեկ ա տեղյակ չէր, ուրեմն նշանակում է, որ հետախուզական աշխատանքի տեղեկատվական բլոկը չի աշխատել: Պարտավոր էին տեղեկացնել, բայց թերացել են»,-ասաց Վովա Վարդանովը:

Նա ընդգծում է, որ հենց այս թերացման համար էլ պետք է համապատասխան պաշտոնյաները պատասխան տային իրենց պաշտոնանկությամբ: Ավելին՝ ըստ նախկին հետախույզի, սա մեղմ պատիժ է:

«Դա քիչ է. պռոմըխների համար գնդակահարում կամ գլխատում են հրապարակավ: Ու թող չմտածեն, թե իրենց պաշտոնանկության պատճառը որոշ հրապարակումներն են. պատճառը հենց իրենց 120 տոկոսանոց աշխատանքի թերացումն էր»,-նկատեց նախկին հետախույզը՝ հավելելով, որ այս պատերազմական շրջանում նրանք պարտավոր էին աշխատել ոչ թե 100, այլ 120 տոկոսով:

Հիշեցնենք, որ այսօր, նախագահի հրամանով Ալիկ Միրզաբեկյանը ազատվել է Հայաստանի Հանրապետության պաշտպանության նախարարի տեղակալ-նյութատեխնիկական ապահովման դեպարտամենտի պետի պաշտոնից։

Գեներալ-մայոր Արշակ Կարապետյանը ազատվել է Հայաստանի Հանրապետության զինված ուժերի գլխավոր շտաբի հետախուզության վարչության պետի պաշտոնից։
Գեներալ-մայոր Կոմիտաս Մուրադյանն էլ ազատվել է Հայաստանի Հանրապետության զինված ուժերի կապի զորքերի պետ–կապի և ավտոմատացված կառավարման համակարգերի վարչության պետի պաշտոնից: