Պաշտոնանկությունները պետք է շարունակվեն ավելի բարձր մակարդակներով. Գառնիկ Իսագուլյան

Պաշտպանության նախարարությունում պաշտոնանկությունները պատահական չէին, և դեռ պետք է շարունակվեն շատ ավելի բարձր մակարդակով: Այս մասին այսօր՝ ապրիլի 29-ին, ասուլիսի ժամանակ ասաց ՀՀ-ում ԼՂՀ մշտական ներկայացուցչության խորհրդատու Գառնիկ Իսագուլյանը:

«Ես ակնկալում եմ, որ շատ ավելի բարձրաստիճան պաշտոնյաներ պետք է պաշտոնանկ արվեն, որովհետև բանակը, սահմանի պաշտպանությունը, հայ զինվորն արժանի են միանգամայն ուրիշ մոտեցման: Եվ մեզնից յուրաքանչյուրը պետք է հասկանա, որ ղարաբաղա-ադրբեջանական սահմանը չի սկսվում խրամատից, որտեղ կանգնած է հայ զինվորը: Սկսվում է Աբովյան, Բաղրամյան, Մաշտոցի պողոտայից, Մոնումենտի այն այգիներից, որտեղ կառուցվել են տներ»,- ասաց Գառնիկ Իսագուլյանը:

Անդրադառնալով տարածքների զիջման հետ կապված խոսակցություններին, Իսագուլյանը մեկ անգամ ևս նշեց, որ հայկական կողմը ղարաբաղա-ադրբեջանակլան շփման գծում տարածքներ չի զիջել, «եղել է դիրքային փոփոխություն»:

«Մենք տարածք հանձնել ենք Բաղրամյան, Աբովյան, Մաշտոցի պողոտայում, Մոնումենտի այգիներում: Մենք խրամատ չենք կորցրել, կորցրել ենք այդ տները: Մեր զինվորները չեն մահացել, նրանք անմահացել են: Մահացել են նրանք, ովքեր այսօր Երևանում կենդանի քայլում են, շատերը կրում են ուսադիրներ, բարձրաստիճան պաշտոնյաներ են, ունեն շքեղ դղյակներ, այ նրանք մահացել են»,- ասաց Գառնիկ Իսագուլյանը:

Նրա խոսքով՝ պատասխանատվության պետք է ենթարկվեն բոլոր նրանք, ովքեր մինչ պատերազմն ասում էին, որ հայկական կողմը սպառազինությամբ չի զիջում Ադրբեջանին այն դեպքում, երբ պատերազմն այլ բան ցույց տվեց:

«Այդ մարդկանց պետք է կանչել, դա կլինի Պաշտպանության նախարարը, Գլխավոր շտաբի պետը, նրանց տեղակալները, թե ուրիշ մեկը, որ նրանք պատասխանեն՝ թե իրենց ասածն ինչի վրա էր հիմնված, և արդյոք դրանք համապատասխանում էին իրականությանը: