ԳԱՄԿ-երը զբաղված են տարաբնույթ խախտումներով. միայն փող են մսխում

ՀՀ Վերահսկիչ պալատը ստուգումներ է իրականացրել ՀՀ Գյուղատնտեսության նախարարության գյուղատնտեսության աջակցության հանրապետական և մարզային կենտրոն ՓԲԸ-ներում:

Նշվում է, որ ՀՀ գյուղատնտեսության նախարարի հրամանով 1999թ.-ից ՀՀ բոլոր մարզերում ստեղծվել են գյուղատնտեսության աջակցության մարզային կենտրոններ, իսկ Երևանում` մեկ հանրապետական կենտրոն:

Վերահսկողությունն ընդգրկող ժամանակաշրջանում ֆինանսավորումը կազմել է 500,143.8 հազ. դրամ, որից ՀՀ պետական բյուջեի միջոցներով՝ 415,036.3 հազ. դրամ, սեփական գործունեության եկամուտներից՝ 85,107.5 հազ. դրամ:

Նպատակը մարզերի ագրոպարենային համալիրի ձեռնարկություններին, գյուղացիական, գյուղացիական կոլեկտիվ տնտեսություններին, տնտեսավարող սուբյեկտներին խորհրդատվական, տեղեկատվական, մարքեթինգային ծառայությունների մատուցումն է և արտադրության արդյունավետ կազմակերպման գիտական նորույթների, նոր տեխնոլոգիաների ներդրման ուղղությամբ գործնական աջակցության ցուցաբերումը:

Գյուղատնտեսության աջակցության 10 մարզային կենտրոններում 2014 թվականի և 2015 թվականի առաջին եռամսյակում կազմակերպվել է 1356 սեմինար, որից Վերահսկիչ պալատն ընտրանքային կարգով ստուգել է 383-ը կամ 28,2%-ը: Հաշվետվությունները հիմնականում կրում են ձևական բնույթ և ռիսկային են:

Խորհրդատուի կողմից կազմակերպված սեմինարներին միևնույն մասնակցի ստորագրությունները տարբեր ամիսների հաշվետվություններում էականորեն տարբերվում են: Հաճախ գյուղացին տեղյակ չէ և չի մասնակցել սեմինարին, բայց նրա անունը լրացված և ստորագրված է:

Մեկ դեպքով արձանագրվել է, որ մարդը մահացել է դեռևս 2013 թվականի դեկտեմբերին, սակայն խորհրդատուի կողմից համայնքում 2015 թվականի մարտին կազմակերպված սեմինարին հաշվետվությանը կից ցուցակով ներկայացվել է որպես մասնակից, նույնիսկ առկա է եղել ստորագրություն:

Տնօրենների հրամանով 15 խորհրդատու (Արմավիրում՝ 6, Գեղարքունիքում՝ 2, Շիրակում՝ 2, Արագածոտնում՝ 5) գտնվել է արձակուրդում, սակայն այդ ընթացքում, ըստ իրենց կողմից ներկայացված հաշվետվությունների, անցկացրել են սեմինարներ:
2014-2015 թվականների աշխատանքային ծրագրերում ընտրված էին անհասկանալի, հաճախ ոչ տրամաբանական, կրկնվող թեմաներ: Համայնքներում ամեն տարի նույն թեմայով, գրեթե նույն մասնակիցներով անցկացվել էին սեմինարներ:

Որոշ խորհրդատուների մասնագիտական որակավորումը չի համապատասխանում գյուղական խորհրդատվական ծառայությունների ծրագրով նախատեսված պահանջներին:

Խորհրդատուներն, ունենալով մանկավարժի, ինժեների, դեղագործի, տնտեսագետի երկրաբանի, որակավորում կամ, ընդհանրապես չունենալով որակավորում, (օրինակ` 5-րդ կուրսից հեռացված ուսանող) խորհրդատվական ծառայություններ են մատուցել ագրոնոմիական, անասնաբուծության կամ անասնաբուժության թեմաներով:

Շիրակի մարզը սպասարկող թվով 10 խորհրդատուից 6-ի տարիքն անցնում է 65-ը, դեռ ավելին, նրանցից մեկը 78 տարեկան է, իսկ մյուսը` 79, Լոռու մարզում երեք խորհրդատուի տարիքն անցնում է 65-ը, նրանցից մեկը 71 տարեկան է: Նրանք սպասարկում են յուրաքանչյուրը 7-10 համայնք:
Առավել ռիսկային է համարվել գյուղատնտեսության աջակցության մարզային կենտրոնների կողմից որոշ ընկերություններին հանձնված մեկական Բելառուս մակնիշի տրակտորներով և կցված գյուղատնտեսական տեխնիկայի միջոցով մատուցվող ծառայությունները (հունձ, վար, ցանք, սրսկում, հակավորում):
Մարզերից 4-ում (Արագածոտն, Արմավիր, Կոտայք, Գեղարքունիք) տրակտորների վրա առկա աշխատանքային ժամերն արձանագրող էլեկտրոնային ցուցիչը փաստում է, որ ընկերությունների բյուջե կարող էր մուտքագրվել ավելի շատ եկամուտ, քան փաստացի ապահովվել է:

Ըստ գյուղացիներից ստացված տեղեկությունների և ուսումնասիրությունների ծառայությունների մատուցման պայմանագրերը հիմնականում կրում են ձևական բնույթ և չեն համապատասխանում իրականությանը: Գյուղատնտեսական տեխնիկայի միջոցով ծառայությունների մատուցման որոշ վճարներ չեն հաշվառվել: