Վերելակը գնվել է մոտ 30 տոկոս ավելի թանկ գնով. գնումների գործընթացը չի կարգավորվում

Վերահսկիչ պալատն անդրադարձել է ՀՀ ֆինանսների նախարարության Արտասահմանյան ֆինանսական ծրագրերի կառավարման կենտրոնի կողմից իրականացվող որոշ ծրագրերի վերահսկողությանը:

Ուսումնասիրվել է էլեկտրոնային հասարակության մրցունակության համար նորարարության վարկային ծրագրի շրջանակներում Հայաստանի պետական ճարտարագիտական համալսարանի (Պոլիտեխնիկ) Մայքրոսոֆթ Ինովացիոն կենտրոնի վերելակի ձեռք բերման, մատակարարման և տեղադրման մրցույթի գործընթացը:

Մրցույթին մասնակցել է 4 ընկերություն: Հաղթող է ճանաչվել Վերելակ մոնտաժ ՍՊԸ-ն, որի համասեփականատերը, միաժամանակ, հանդիսանում է մրցույթին մասնակցած մյուս երկու ընկերությունների համասեփականատեր: Այդուհանդերձ, Վերելակ մոնտաժ ՍՊԸ-ի հետ կնքվել է 18,720.0 հազ. դրամի չափով պայմանագիր:

Հատկանշական է, որ Վերահսկիչ պալատի աշխատակիցների հարցմանն ի պատասխան, Վերելակ մոնտաժ ՍՊԸ-ն ներկայացրել է առևտրային առաջարկ, ըստ որի, նույն վերելակի արժեքը կազմել է 13,440.0 հազ. դրամ: Ստացվում է, որ տվյալ վերելակը վարկային միջոցներով ձեռք է բերվել շուկայական արժեքից 5,280.0 հազ. դրամ թանկ գնով:

Բացի այդ, ուսումնասիրվել է էլեկտրոնային հասարակության մրցունակության համար նորարարության վարկային ծրագրի 6 մրցութային փաթեթի (ընդհանուր գումարը՝ 1,189.14 հազ. ԱՄՆ դոլար) նախահաշվային գները: Նախահաշվային գները ձևավորվել են վարկային ծրագրի իրականացման պատասխանատու Ձեռնարկությունների ինկուբատոր հիմնադրամի կողմից:

Ուսումնասիրված 6 փաթեթներում նախահաշվային և շուկայական գների տարբերությունները, ինչպես նաև մասնագրերում նույնությամբ կրկնվող ապրանքատեսակների ձևավորված գների միջև առկա շեղումները ներկայացվել են ծրագրերի իրականացման գրասենյակին և պատվիրատուին: