Բանակցությունները դադարել էին հենց Ադրբեջանի մեղքով. Ա.Ռուստամյան

Եվրոպայի խորհրդի խորհրդարանական վեհաժողովի հայաստանյան մոնիթորինգի համազեկուցողների հետ հանդիպմանը «Հայ Յեղափոխական Դաշնակցություն» խմբակցության պատգամավորներն անդրադարձել են նաև ղարաբաղյան իրադարձություններին:

ԱԺ-ում հանդիպումից հետո լրագրողների հետ զրույցում ՀՅԴ խմբակցության ղեկավար Արմեն Ռուստամյանը ներկայացրեց համազեկուցողներին փոխանցած մտահոգությունը, որ պատերազմական գործողությունները ներքին բարեփոխումներ իրականացնող երկրի համար մեծ փորձություն են:

«Պահանջել ենք, որ առիթ ստեղծեն ու այցելեն Ղարաբաղ, իսկ եթե չեն էլ այցելում,ապա գոնե պետք է հստակ գնահատական տան, թե ով սկսեց պատերազմը։ Իրականությունն այն է, որ ո՛չ Հայաստանը և ո՛չ էլ Ղարաբաղը որևէ դրդապատճառ չունեն սկսելու, և հենց Ադրբեջանն էր, որ ստատուս քվոն փոխելու մասին էր խոսում, ընդ որում՝ ռազմական ճանապարհով։ Ըստ էության, բանակցությունները դադարել էին հենց Ադրբեջանի մեղքով»,- ներկայացրեց Ռուստամյանը:

ՀՅԴ-ն նաև սուտ ու կեղծ լուրեր է համարել Ադրբեջանի կողմից տարածվող այն հայտարարությունը, թե իբր Ռոբերտ Վոլթերի զեկույցը չընդունվեց, ու այդ պատճառով պատերազմական գործողությունները սանձազերծվեցին:

Ըստ նրա, ճիշտ հակառակն է տեղի ունեցել, ամեն ինչ անում էր Ադրբեջանը, որպեսզի այդ գործողություններն արդարացնի՝ ասելով որ ինքն իրավունք ունի իր պատկերացրած ձևով հարցը լուծելու, և դրա պաշտպանությունը ստացել է նաև Եվրոպայի Խորհրդի կողմից և գոնե Վոլթերի գլխավոր փաստաթուղթը մերժվեց, բայց մնաց մյուսը և պատահական չէ, որ ինտենսիվ գործողությունները եղել են հենց Սարսանգի ջրամբարի ուղղությամբ, որովհետև Ադրբեջանը համարում էր դրա համար կանաչ լույս է ստացել:

Արմեն Ռուստամյանը նաև նշեց, որ համազեկուցողները Ղարաբաղի մասով ասում են, որ օրակարգում պետք է անպայման պահեն Ղարաբաղ այցելելու հարցը: Անպայման պետք է կանխեն պատերազմական այդ գործողությունները և ընդունում են, որ այստեղ լուրջ անելիք ունի Եվրոպայի խորհուրդը: