Էլեկտրամատակարարման հուսալիության ծրագրի 52 մլն դոլարի անհուսալիությունը

Վերահսկիչ պալատն անդրադարձել է ՀՀ էներգետիկայի և բնական պաշարների նախարարության Բարձրավոլտ էլեկտրացանցեր ՓԲԸ-ի և Հայաստանի վերականգնվող էներգետիկայի և էներգախնայողության հիմնադրամի կողմից իրագործվող մի շարք ծրագերին: Մասնավորապես ուսումնասիրել է Էլեկտրամատակարարման հուսալիության ծրագիրը:

Ծրագիրը պայմանավորված է Հայաստանի էլեկտրահաղորդման համակարգի հին և ոչ բարվոք ենթակառուցվածքների վերակառուցման անհրաժեշտությամբ:

Նախատեսվել է 220կվ հզորության 228 կմ էլեկտրահաղորդման նոր գծերի (հաղորդալար, հենասյուն, բետոնյա հիմք, մեկուսիչ և այլ բաղադրիչ) կառուցում: Նոր գծերը պետք է կառուցվեն հնին զուգահեռ, ընդ որում, հինը կապամոնտաժվի, երբ նոր գծերը ենթարկվեն շահագործման:
Ծրագիրը մեկնարկել է 2011 թվականի հունիսից: Այն նախատեսվում է ավարտել 2016 թվականի հուլիսին:

Ծրագրի արժեքը 52.0 մլն ԱՄՆ դոլար է, այդ թվում` 39.0 մլն ԱՄՆ դոլարը Վերակառուցման և զարգացման միջազգային բանկի վարկային միջոցներն են, իսկ 13.0 մլն ԱՄՆ դոլարը ՀՀ պետական բյուջեի համաֆինանսավորման:

Ծրագրի կատարման պատասխանատուն Բարձրավոլտ էլեկտրացանցեր ՓԲԸ-ն է:
Վերահսկողությամբ արձանագրված հիմնական փաստերն են խորհրդատուի կողմից պայմանագրային պարտավորությունների թերի կատարման, ինչպես նաև Բարձրավոլտ էլեկտրացանցեր ՓԲԸ-ի կողմից համայնքային և սեփականության իրավունքով պատկանող հողերի ձեռք բերման գործընթացի ձգձգման արդյունքում ստուգման պահի դրությամբ նախատեսված 719 անկյունային և խարսխային հենարանի 19%-ն արդեն ենթարկվել էր փոփոխության:

Երկաթբետոնե հիմքերի մոնտաժման աշխատանքը թերի է կատարվել: Նախատեսված 88% -ի փոխարեն փաստացի կատարվել է 63.4%-ը:

Մետաղական հենարանների տեղադրման աշխատանքը թերի է կատարվել: Նախատեսված 75% -ի փոխարեն փաստացի կատարվել է 33.8%-ը:

Հաղորդալարերի ձգման աշխատանքը թերի է կատարվել: Նախատեսված 75% -ի փոխարեն փաստացի կատարվել է 15.6%-ը:

Շինարարական նախագծերը կատարվել են առանց սահմանված կարգով պահանջվող հորատանցքերի հիման վրա տրված երկրաբանական հետազոտության արդյունքների:

Ընտրանքային ստուգմամբ արձանագրվել են առանձին դեպքեր, երբ հենարանների հիմքերի միաձույլ բետոնի ամրությունը չի համապատասխանել կապալի պայմանագրով հաստատված չափանիշին` 300 ԴաՆ/սմ2:

Հենարանների հիմքերում հողի հետլիցքի /տոփանման/ աշխատանքներում, ըստ ակնադիտական ուսումնասիրությունների, առկա են նստվածքներ, որը հետևանք է շինարարական տեխնոլոգիայի խախտման:

Պարզվել է, որ 52 մլն դոլար վարկի շրջանակներում իրականացված աշխատանքներից մոնտաժման աշխատանքը թերի է կատարվել, հենարանների հիմքերի միաձույլ բետոնի ամրությունը չի համապատասխանել կապալի պայմանագրով հաստատված չափանիշին, հենարանների հիմքերում հողի հետլիցքում առկա են նստվածքներ, որը հետևանք է շինարարական տեխնոլոգիայի խախտման և այլն:

ՎՊ-ն չի պատասխանել այն հարցին, թե արդյոք 52 մլն դոլարը նպատակային է ծախսվել. հաշվի առնելով ՎՊ-ի բացահայտումները 52 մլն դոլարի շրջանակներում էներգետիկ ոլորտում որևէ աշխատանք բարեխղճորեն չի կատարվել: