Հայաստանում կոռուպցիայի դեմ պայքարը պետք է ընթանա վերևից ներքև. ԵՄ դեսպան

Գեղարքունիքի մարզի հասարակական կազմակերպությունների և զանգվածային լրատվամիջոցների ղեկավարների հետ հանդիպման ժամանակ Հայաստանում ԵՄ դեսպան Պյոտր Սվիտալսկին արտահայտեց իր դիրքորոշումը Հայաստանում կոռուպցիայի թողած հետևանքների և նրա դեմ պայքարի անհրաժեշտության մասին:

«Արմենպրես»-ի տեղեկացմամբ՝ ԵՄ դեսպանը շեշտել է, որ իրենք շատ են կարևորում Հայաստանի տնտեսության ապակենտրոնացումը և մրցակցային արդար դաշտի ձևավորումը, տնտեսական մենաշնորհների վերացումը, որոնք մեծապես կնպաստեն փոքր և միջին ձեռնարկատիրության ոլորտի զարգացմանը, նոր և կայուն աշխատատեղերի ստեղծմանը:

«Մեր դիտարկմամբ՝ Հայաստանը շատ ավելի տուժում է կոռուպցիայից, որի դեմ պայքարը պետք է ընթանա վերևից ներքև, այդ դեպքում միայն այդ պայքարը կավարտվի հաջողությամբ: Եվ մենք աջակցելու ենք վերևից ներ քև տարվող պայքարին: Կոռուպցիան Հայաստանի Հանրապետության համար արդեն դարձել է ազգային անվտանգության խնդիր: Դուք պետք է ունենաք կոռուպցիայի դեմ պայքարի անկախ հետաքննական մարմին»,-շեշտել է դեսպանը:

Լրագրողի հարցին, թե ավելի արդյունավետ չէ՞ր լինի աջակցել կոռուպցիայի դեմ ներքևից վերև պայքարին, Հայաստանում քաղաքացիական հասարակության ուժեղացմանը, դեսպանը պատասխանել է. «Հայաստանի Հանրապետությունն ունի քաղացիական ուժեղ հասարակություն, նա կարողանում է բացահայտել բազմաթիվ չարաշահումներ, կոռուպցիոն տարրեր, հաջողությամբ պայքարել դրան ց դեմ, սակայն շատ ավելի հաջողված կլինի վերևից ներքև պայքարը, որն ավելի արդյունավետ ճանապարհ ենք համարում»։