Ի՞նչ է, որոշել ենք պատմության ասպարեզը թողնե՞լ. ժամանակ չունենք, պետք է պատրաստվենք պատերազմի

Newspress.am-ի հետ զրույցում անդրադառնալով սահմանի հարաբերական անդորրին՝ քաղաքագետ Լևոն Շիրինյանը նկատում է, որ ադրբեջանական կողմն ընդհանրացնում է արդյունքները. հաշվարկում է իր առավելություններն ու բացթողումները, վերազինվում է, որի համար, քաղաքագետի դիտարկմամբ, փող չի խնայելու:

«Հայկական կողմը թող պատրանքներ չունենա. հիմա ուղղակի որոշակի պաուզայի վիճակ է՝ դա մեկ: Երկրորդ՝ նրանք պետք է մի քիչ անմեղ ոչխարի տեսք ընդունեն, իբր խելոքացել են, բայց ստրատեգիական իմաստով այս բոլորը հայկական կողմին մոլորության մեջ գցելն է, որ իրենք փոխվել են: Թուրքը չի փոխվում, իրենց նպատակը չի փոխվում»,-նկատում է քաղաքագետը՝ հավելելով, որ սրանից հետո էսկալացիա պետք է սպասել:

Լևոն Շիրինյանը նկատում է, որ պատերազմի հարցը արևմուտքից է ներդրվում: Ըստ նրա՝ եթե ասում են այս հարցը ռազմական լուծում չունի, ուրեմն այն միայն ու միայն ռազմական ճանապարհով պետք է լուծվի:

Նա վստահ է՝ հակառակորդը հարմար պահի է սպասում, որ հարվածի, իսկ հայկական կողմը գլուխկոտրուկով է զբաղված:

«Մինչև մտածեն, թե պատերազմ կլինի-չի լինի, կլինի-չի լինի, պետք է շատ արագ ռազմաճակատի գիծը տեխնիկապես հագեցվի, բանակը շատ արագ կարգի պետք է բերվի…»,-ասում է քաղաքագետը:

Այն, որ պատերազմ է լինելու, Լևոն Շիրինյանը երկրոդ կարծիք չունի, սակայն ըստ նրա՝ այն պետք է սկսկել Արցախի սահմաններից դուրս:

«Եթե այդպես չլինի, կջախջախվենք, իմացեք՝ դա մեկ, երկրորդը՝ գալիք ճակատամարտերը լինելու են ռազմավարական մտածողության և ռազմական արվեստի շրջանակներում, ուրիշ բան չի լինելու»,-ասաց Շիրինյանը:

Նա ընդգծում է նաև, որ որպես ազգ և պետություն, Հայաստանն իրական դաշնակից չունի:

«Ի՞նչ է, որոշել ենք պատմության ասպարեզը թողնե՞լ: Մենք ժամանակ չունենք, պետք է արագ ամեն ինչ կարգի բերել: Մենք ենք, մեր բանակն ու մեր պետությունը»,-եզրափակեց Շիրինյանը: