ՎՊ-ն դատական դեպարտամենտում մի շարք խախտումներ է արձանագրել

Վերահսիչ պալատը վերահսկողություն է իրականացել ՀՀ դատական դեպարտամենտում և ՀՀ դատարաններում (բացառությամբ` ՀՀ Սահմանադրական դատարանի):

Վերահսկողությամբ արձանագրված հիմնական փաստերն են.

Դատական ավտոմատացված համակարգը համապատասխանեցված չէ Պետական տուրքի մասին ՀՀ օրենքի պահանջներին, ինչպես նաև 2013 թվականին ՀՀ դատարանների նախագահների խորհրդի թիվ 129 որոշմամբ պետական տուրքի գանձման կարգի, հայցագնի և դրա որոշման առանձնահատկությունների վերաբերյալ տրվող պաշտոնական պարզաբանումներին: Այդ որոշման թվով 40 պահանջներից Համակարգում իրագործված չեն 24-ը, մասամբ են իրագործված 12-ը, իրագործված են 4-ը:

Սպասարկման ծառայությունների մատուցման ընթացքում կազմված հանձնման-ընդունման արձանագրությունները մանրամասն չեն նկարագրում փաստացի կատարված աշխատանքները, ծրագրային փոփոխությունները:

Վերահսկվող ժամանակահատվածում Դեպարտամենտի կողմից հանդերձանքի ձեռքբերման համար իրականացվել է ոչ միատեսակ մոտեցում, հաստատվել են իրարամերժ և չհիմնավորված տեխնիկական բնութագրեր, որի արդյունքում կատարվել ն Դատական կարգադրիչի համազգեստի, տարբերանշանների և խորհրդանշանների նկարագիրը սահմանելու մասին ՀՀ կառավարության 2008 թվականի հունվարի 17-ի թիվ 43-Ա որոշման պահանջներին անհամապատասխան գնումներ:

Կարգադրիչների հանդերձանքի ձեռքբերման համար 2014թ.-ից մինչև 2015թ.-ի սեպտեմբերի 1-ն ընկած ժամանակահատվածի համար պետական բյուջեի միջոցներից տրամադրվել է 69,834.9 հազ. դրամ գումար, որից 17,037.5 հազ. դրամ գումարը արդյունավետ համարվել չի կարող: Համաձայն ՀՀ օրենսդրության և մատակարարման պայմանագրերի համապատասխան դրույթների, անհամապատասխան ապրանքները պետք է վերադարձվեն մատակարարներին:
Վերադարձման ենթակա անհամապատասխան ապրանքների մատակարարումն իրականացրած կազմակերպությունների նկատմամբ, համաձայն մատակարարման պայմանագրերի, պատվիրատուի կողմից պետք է հաշվարկվի տույժ և տուգանք:

Դեպարտամենտի կողմից ներկայացված պարզաբանման մեջ նշվել է, որ տեխնիկական բնութագրին չհամապատասխանող ապրանքները փոխարինվել են պատշաճ որակի ապրանքներով:

Թարգմանչական գործերին կցված չեն պայմանագրով պահանջվող թարգմանիչների որակավորումը հավաստող փաստաթղթերը:

Բավարար չի եղել հսկողական գործառույթներում միավորների ընդգրկվածության աստիճանը՝ ռազմավարական և տարեկան ծրագրերում աուդիտի ենթակա միավորների թվաքանակի նվազում է արձանագրվել:

Դեպարտամենտի հաշվեկշռում չհաշվառված 4 վարչական շենքերում տեղակայվել են պետական այլ հիմնարկներ, որոնց էլ. էներգիայի և կոմունալ ծախսերն (649.6 հազ. դրամ) կատարվել են Դեպարտամենտի կողմից:

Մի շարք դեպքերում իրականացված դատաքննություններում չի ապահովվում օրենքի միատեսակ կիրառությունը, խախտվում են ՀՀ Քաղաքացիական օրենսգրքով Քաղաքացիական դատավարության օրենսգրքով, ինչպես նաև Պետական տուրքի մասին ՀՀ օրենքով և ՀՀ դատարանների նախագահների խորհրդի թիվ 129 որոշմամբ նախատեսված համապատասխան դրույթները, որի արդյունքում ՀՀ պետական բյուջե պակաս գանձված տուրքի և դրա նկատմամբ հաշվարկված տույժերը պետք է կազմեն 22,294.4 հազ. դրամ և 6,687 ԱՄՆ դոլարին համարժեք ՀՀ դրամ: