Սուքիասյանների «Սիլաչի» հյուրանոցը խարխլում է ուրիշների տները

Newspress.am-ն այսօր հերթական ահազանգն ստացավ Տիգրան Մեծ պողոտայի 3-րդ նրբանցքի՝ «Սիլաչի» հյուրանոցի հարևանությամբ գտնվող սեփական տների բնակիչների կողմից: Պատճառը շղթայաբար իրականացվող շինարարություններն են, որոնք վերջին տարիներին պատուհաս են դարձել Երևան քաղաքի բնակիչների համար: Բնակիչներից մեկը նշում է, որ «Սիլաչի» հյուրանոցը մեծացնելու նպատակով իրականացվող շինարարության պատճառով, իրենց տները դարձել են վթարային:

«Սիլաչի» հյուրանոցը պատկանում է Սուքիասյանների ընտանիքին, ժամանակին մայրաքաղաքում այս հյուրանոցը համարվում էր շքեղ հյուրանոցներից մեկը: Դա այն ժամանակներն էր, երբ Սուքիասյանները իշխանությունների հետ ապրում էին իրենց շքեղ կյանքը: 2008-ի մարտի 1-ի դեպքերից հետո միանգամից կտրվեց իշխանության և Սուքիասյան ընտանիքի կապը: «Սիլաչի» հյուրանոցը ինչպես նաև նրա մերձակա տարածքը մնացին չխնմված, մինչ մոտ երկու տարի առաջ վերականգնվեց Սուքիասյան ընտանիքի, և իշխանության մերձավոր կապը, որից անմիջապես հետո դա ակնհայտ դարձավ «Ռոսիա» կինոթատրոնից մինչև «Սիլաչի» հյուրանոց ձգվող լայնածավալ շինարարական աշխատանքով:

Պարզապես ժամանակներն են փոխվել, բնակիչներն այլևս չեն հանդուրժում այն փողատերերին, ովքեր հարստանում են ոչ միայն իրենց հաշվին, այլ նաև իրենց ոչ այնքան շքեղ տները խարխլելու հաշվին: Ըստ մեր ունեցած տեղեկությունների` հյուրանոցային համալիրի ընդլայնման շինարարական աշխատանքներն իրականացվում են կառուցապատող «ԱՍՏՈՐԻԱ» ՍՊԸ-ի կողմից՝ Երևանի քաղաքապետարանի հետ համաձայնեցված շինարարության թույլտվության հիման վրա: Ակներև է, որ փլուզման դեպքի գրանցման պարագայում որև է մեկը փոխհատուցում չի տա տուժած բնակիչներին, քանի որ հակառակ դեպքում շինարարական աշխատանքներ չէր իրականացվի: Ժամանակին խախտվել է այդ բնակիչների իրավունքը, ոմանց թեթև ձեռքով չի պահպանվել հյուրանոցի և հարակից տների միջև ընկած հեռավորությունը:

Հավելենք, որ նոր տարվող շինարարության նախագիծն անցել է համապատասխան փորձաքննություն, որի հիման վրա տրվել է մասնագիտական դրական եզրակացություն, բայց փաստորեն հետևանքներն այնքան էլ դրական ազդեցություն չեն թողնում մարդկանց բնակարանների վրա: 17Քաղաքապետարանը նշում է, որ հիշյալ հասցեում Երևանի քաղաքապետարանի աշխատակազմի ներկայացուցիչների կողմից լրացուցիչ կատարված ակնադիտական տեղատեսությամբ չի կարող հիմնավորվել այդ հասցեում իրականացվող շինարարական աշխատանքների հետևանքով՝ Տիգրան Մեծի պողոտայի 3-րդ նրբանցքի հ.14 հասցեում գտնվող անշարժ գույքին պատճառվող հնարավոր վնասների փաստական հանգամանքը, ավելին՝ նման եզրակացություն տրամադրելը՝ քաղաքաշինական գործունեության առումով, համարվում է լիցենզավորված գործունեություն (մասնավորապես խոսքը վերաբերում է տեխնիկական հետազննություն իրականացնելուն), այդ իսկ պատճառով էլ առաջարկվել է հարցին շահագրգիռ երկու կողմերին՝ հնարավոր վնասների փաստական հանգամանքները հիմնավորել համապատասխան մասնագիտական եզրակացությամբ, իսկ դրանք հիմնավորվելու դեպքում կողմերի միջև ընդհանուր փոխադարձ համաձայնություն ձեռք չբերվելու դեպքում, հարցը ենթակա է կարգավորման դատական կարգով, քանի որ «Քաղաքաշինության մասին» ՀՀ օրենքի 27-րդ հոդվածի համաձայն քաղաքաշինական գործունեության հետ կապված վեճերը լուծվում են դատական կարգով: