Թվային հեռարձակումն ուշանում է

Հունվարի 1-ից Հայաստանում պետք է դադրեցվեր անալոգային հեռարձակումը և անցում կատարվեր թվային հեռարձակման: Սակայն այսօր խնդիրը դեռևս լուծված չէ: Տրանսպորտի և կապի փոխնախարար Արթուր Առաքելյանի խոսքով անալոգային հեռարձակում կլինի միայն այն ժամանակ՝ երբ լրացուցիչ 60.000 կցորդ սարքերը բաժանվեն սոցիալապես անապահով խմբերին։

«Անցած տարվա ավարտին կառավարությունը գումար հատկացրեց, որպեսզի սոցիալապես խոցելի խավերին անվճար տրամադրվի այդ ընդունիչ սարքերը, սակայն հետո վերլուծություն իրականացվեց, և վարչապետը որոշեց լրացուցիչ գումար հատկացնել, որպեսզի ևս 60.000 կցորդ սարքեր բաժանվեն, ընդ որում, նախորդ տարի 48.000 հատկացում եղավ, ամբողջությամբ բաժանվել է։ Մոտակա օրերին մենք սպասում ենք մոտ 60.000 հատի մատակարարում, դրանց բաշխումը կիրականացվի շատ կարճ ժամանակում։ Քանի որ մեխանիզմը խիստ որոշակի է, մենք արդեն փուլային անջատումներ կանենք», – ասել է Առաքելյանը։

Փոխնախարարի խոսքով` թվայնացման գումարները ծախսվել են նպատակային, իսկ թվային ազդանշանը հասանելի է հանրապետության ողջ տարածքում:ՀՀ կառավարության 2015թ. դեկտեմբերի 24-ի համապատասխան որոշմամբ DVB-T2 ստանդարտի թվային հեռուստատեսային ընդունիչ սարքեր են տրամադրվել սոցիալապես անապահով 46.494 ընտանիքի, սակայն դեռևս 61.064 սոցիալապես անապահով ընտանիք չունի թվային հեռուստատեսային հաղորդումներ դիտելու հնարավորություն:

Կառավարության որոշմամբ սոցիալապես անապահով ևս 61.064 ընտանիքին որպես սոցիալական աջակցություն հատկացված DVB-T2 ստանդարտի թվային հեռուստատեսային ընդունիչ սարքերի բաշխումն իրականացվելու է սոցիալական աջակցության տարածքային գործակալությունների (բաժինների) միջոցով:Անվճար սարքերը տրամադրվելու են նաև ՀՀ սահմանների պաշտպանության ժամանակ զոհված զինծառայողների ընտանիքներին:

Թվային սարքերի կարիքը հատկապես զգացվում է մարզերում, քանի որ մայրաքաղաքում բնակչության մեծ մասը հանդիսանում է մալուխային հեռուստատեսության բաժանորդ: Սարքը, որը ներկրվում է Չինաստանից արժե մոտ 8000 դրամ, վերջինիս երաշխիքի ժամկետը մեկ տարի է, և երաշխիքի ժամկետը լրանալուց հետո նոր սարք ձեռք բերելու խնդիրը կրկին մնում է անապահով ընտանիքի խնդիրը:

Փաստորեն մեկանգամյա օգտագործման համար պետբյուջեից ծախսվել է մոտ կես մլն. դրամ: