Հայաստանը տուժում է մինի մենաշնորհից. Սվիտալսկի

«Ցանկացած երկրում տնտեսական մրցակցությունը պաշտպանող գործակալությունը կամ մարմինը պետք է լինի հզոր և անկախ իր որոշումների և գործունեության մեջ»:

Երևանում «ՀՀ Տնտեսական մրցակցության պաշտպանության օրենսդրության և իրավակիրառական պրակտիկայի հայեցակարգային և սահմանադրաիրավական վերլուծություն» թեմայով կոնֆերանսի ժամանակ հայտարարել է ՀՀ-ում Եվրոպական միության պատվիրակության ղեկավար, դեսպան Պյոտր Սվիտալսկին:

«Հայաստանը տուժում է, քանի որ նրա վրա փակցված է այն իմիջը, որ երկրում առկա են մինի մենաշնորհներ»:

Նա նշել է, որ հստակ չգիտի՝ այս վարկածը ճիշտ է, թե ոչ, բայց վերջին տարիներին առաջընթաց է նկատվում մրցակցության ոլորտում, և իրենք իրենց համեստ ներդրումով, բայց ամուր կամքով պատրաստ են աջակցել Հայաստանի կառավարությանը, և տեղյակ են, որ Հայաստանում կան տարբեր գործակալություններ, որոնք իրավունք ունեն ստուգումներ անցկացնել, միևնույն ժամանակ շեշտելով, որ տվյալ գործակալությունը պետք է լինի հզոր և անկախ կառույց:

Ըստ Սվիտալսկիի՝ Հայաստանում բարենպաստ բիզնես միջավայր ստեղծելու համար Տնտեսական մրցակցության պաշտպանության պետական հանձնաժողովը մեծ գործ ունի անելու: Իսկ դրա համար ճիշտ ճանապարհներից մեկն այն է, որ պետք է հանձնաժողովն առանց տեղյակ պահելու քննություն կամ ուսումնասիրություն իրականացնի:

Իսկ էկոնոմիկայի նախարար Արծվիկ Մինասյանը, ով պաշտոնը ստանձնելու առաջին օրն իսկ հայտարարել էր, որ պայքար է սկսելու մենաշնորհների դեմ, նույն համաժողովի ժամանակ ասել է. «Մենք հաճախ խոսում ենք արհեստական գերիշխանության կամ առանձին դեպքերում անգամ մենաշնորհային վիճակների մասին, սակայն պետք է մեզ հարց տանք, թե արդյոք այդքան հե՞շտ է դրանց դեմ պայքարը»:

Նախարարի խոսքով՝ մենք հանրային իշխանությունը բիզնեսից տարանջատելու մեխանիզմ գտնելու անհրաժեշտություն ունենք. «Ամբողջ դաշտը սահմանադրական նորմի ներքո պետք է վերափոխվի»:

«Սա նախաձեռնություն է, որի մասին պետք է մտածել»,- ասաց Սվիտալսկին:

Նշենք նաև, որ այս համաժողովին ՏՄՊՊՀ որևէ ներկայացուցիչ ներկա չի եղել, թեև զեկույցը և հրավերը նախապես ուղարկվել է: