Հայաստանը` ռուս-թուրքական էպիկենտրոնում

ՌԴ նախագահի խոսնակ Դմիտրի Պեսկովը մեկնաբանել է Թուրքիայի նախագահ Ռեջեփ Թայիփ Էրդողանի այն հայտարարությունը, թե ինքը ցանկանում է կարգավորել հարաբերությունները Ռուսաստանի հետ, սակայն չի հասկանում, թե ինչ է իրենից սպասում Մոսկվան:
ՌԴ նախագահի խոսնակը հիշեցրել է, որ ռուսական կողմն սպասում է ներողության, խոցված օդանավի դիմաց և օդաչուի ընտանիքին տրվելիք փոխհատուցման և կատարվածի մասին բացատրության:

Նշենք, որ խոսքը Թուրքիայի ռազմաօդային ծառայությունների կողմից թուրք-սիրիական սահմանը հատած ռուսական ՍՈւ-24 ինքնաթիռի խոցման մասին է, ինչի առնչությամբ Թուրքիան բազմիցս հայտարարել էր, որ մի քանի անգամ զգուշացվելուց հետո նոր խոցվել է ինքնաթիռը Թուրքիայի սահմանը հատելու համար:

Թուրքիան, երևում է, իր դիրքորոշման մեջ փոփոխություն չի մտցնի:

Ամիսներ առաջ CNN-ին տված հարցազրույցում Թուրքիայի նախագահն ասել էր, որ Թուրքիան ռուսական օդանավը խոցելու համար ներողություն չի խնդրի, ավելին, ներողություն պետք է խնդրի նա, ով խախտել է Թուրքիայի օդային սահմանը:

Թուրքիայի կողմից ռուսական ինքնաթիռի խոցումից հետո տարածաշրջանային երկրներն սկսեցին պաշտպանել կա′մ Թուրքիայի, կա′մ Ռուսաստանի շահերը: Հայկական կողմը երկրորդ ճամբարում էր, Վրաստանը՝ հակառակ, յուրաքանչյուրն հաշվի էր առնում իր սեփական շահը:

«Թուրքական հոսքի» չեղյալ համարում, տնտեսական պատժամիջոցներ, Թուրքիայի քաղաքացիների նկատմամբ իրավունքների սահմանափակումներ և այլն, սակայն մինչ օրս ռուս-թուրքական հարաբերություններն այդ աստիճան չեն լարվել և Ռուսաստանը նշվածներից և ոչ մի քայլին չի դիմել, բացառությամբ մեկ-երկու ցույցերից թուրքական ընկերությունների դիմաց:

Ինքնաթիռի խոցումից հետո Թուրքիայի և Ռուսաստանի հարաբերությունները նախկինի պես չեն, սակայն դրանք լարված որակել չարժե: Պարզապես, Ռուսաստանը պետք է պահի իր ուժեղ լինելու մասին տպավորության նշաձողը և պահանջի ներողություն:

Անկախ ամեն ինչից`Հայաստանն այդ երկու երկրի էպիկենտրոնում է գտնվում, և տարածաշրջանում անվտանգության և խաղաղության ոչ կայունությունն իր ուղղակի կամ անուղղակի ազդեցությունը կունենա նաև Հայաստանի վրա: