Սվիտալսկին միակն է, որ տեսնում է` ՏՄՊՊՀ-ն մերկ է

Հայաստանում Եվրամիության պատվիրակության ղեկավար Պյոտր Սվիտալսկին հայտարարել է, որ Հայաստանում բարենպաստ բիզնես միջավայր ստեղծելու համար Տնտեսական մրցակցության պաշտպանության պետական հանձնաժողովը (ՏՄՊՊՀ) մեծ գործ ունի անելու:
Պ. Սվիտալսկին նշել է նաև` Հայաստանը տուժում է, քանի որ նրա վրա փակցված է այն իմիջը, որ երկրում առկա են մինի մենաշնորհներ և ազատ մրցակցությունն է, որ պետք է առաջ տանի տնտեսության զարգացումը:

Էկոնոմիկայի նախարար Արծվիկ Մինասյանն իր հերթին հռետորական հարց է տվել, թե արդյոք այդքան հե՞շտ է մենաշնորհների դեմ պայքարը, թեև մինչև վերջերս համոզված էր, որ կարող են պայքարել և տնտեսության զարգացման խոչընդոտներից մեկը հենց մենաշնորհն է և լծվել էր մենաշնորհների դեմ պայքարին:

Նշենք, որ երբ ստեղծվեց Տնտեսական մրցակցության պաշտպանության պետական հանձնաժողովը, ապա առանձնացվեցին գերիշխող դիրք ունեցող ոլորտներ և ներկրման մենաշնորհ ունեցող ընկերությունների ցանկը:

ՏՄՊՊՀ-ն պարզապես արձանագրեց, որ դաշտում մենաշնորհ կա, գերիշխող դիրք ունեցողներ կան. ՏՄՊՊՀ-ի գործը այդ ֆունկցիաները չչարաշահեն, սակայն այդպես էլ պարզ չէր, թե որտեղ սկսվեց չարաշահումը և ավարտվեց գերիշխող դիրքը, որտեղ հատվեցին կամ բաժանվեցին սպառողների շահերը և մենաշնորհների պտուղները:

Կարճ ասած` ՏՄՊՊՀ-ն որևէ լուրջ դերակատարում մենաշնորհների վերացման, կամ գերիշխող դիրքի չարաշահման վերաբերյալ չուներ և պետք էլ չէր որ ունենար, քանի որ ՏՄՊՊՀ Արտակ Շաբոյանը հակառակ դեպքում չէր կարող վարել նման պաշտոն:

Ա. Շաբոյանը հայտարարագրում է իր ունեցվածքը և եթե նա չի կարող ոտք մեկնել օլիգարխիայի փայլուն ներկայացուցիչ-պաշտոնյաների հետ, ապա աղքատ էլ չէ:

ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանի դրամական միջոցները, ըստ հայտարարագրի, կազմել են 13 մլն դրամ, իսկ տարվա վերջին` 23 մլն դրամ:

Նշենք, որ Արտակ Շաբոյանի տարեկան աշխատավարձն ուղիղ դրա կեսն է կազմում` 7 մլն 583 հազար դրամ: Նա եկամուտ է ստացել աշխատավարձ, փոխառություն 40 մլն դրամ և 40.6 մլն դրամ անշարժ գույքի օտարումից:

Արտակ Շաբոյանի կինը՝ Քրիստինե Եղիազարյանը, ավելի մեծ կարողության տեր է, քան իր ամուսինը: ՏՄՊՊՀ նախագահի կնոջ դրամական միջոցները կազմել է 16 մլն դրամ և 53 հազար դոլար: Բացի այդ՝ Արտակ Շաբոյանի կինը փոխառություններից ստացել է 648 հազար դրամ և 71 հազար 20 դոլարի եկամուտ:

Ի դեպ, 2013թ. մայիսի 28-ին Հայաստանի նախագահ Սերժ Սարգսյանն, ի թիվս այլոց, «Անանիա Շիրակացի» մեդալով պարգևատրել է ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանին, իսկ թե ինչի համար՝ պարզ չէ, սակայն պարզ է, որ նա չի կարողացել պայքարել մենաշնորհների դեմ, գերիշխող դիրք ունեցողները շարունակում են նույն ոգով, իսկ բիզնես միջավայրն ակտիվացնելու համար կառույցը գրեթե ոչինչ չի արել, հընթացս ՏՄՊՊՀ նախագահը հարստացել է. և ահա այս կառույցի գործունեությանը ԵՄ պատվիրակության ղեկավարը չի հավատում և այդ ամենը ներկայացնում է եվրոպական բարեկրթությամբ, մնաց՝ գնահատեն: