Արծվիկ Մինասյանը՝ Սամվել Ալեքսանյանի կողքին

ՀՀ էկոնոմիկայի նախարար Արծվիկ Մինասյանը պնդում է, որ մենաշնորհների մասին իր խոսքը կոնտեքստից դուրս է ներկայացվել: «Կուզենայի անդրադառնալ այն ապատեղեկատվությանը, որը տարածվեց մամուլում: Ցավում եմ, որ այդ ապատեղեկատվության մեջ ներգրավվեցին շատ տնտեսագետներ, մասնագետներ: Դիմելով ձեզ` հարգելի′ լրագրողներ, խնդրում եմ, իմ խոսքերը ներկայացրեք այնպես, ինչպես ես ասել եմ, ենթադրություններ մի′ արեք, մի′ կտրեք իմ խոսքը կոնտեքստից ու մի′ փոփոխեք»,- այսօր լրագրողների հետ զրույցում ասաց նախարարը:

Արծվիկ Մինասյանն անդրադառնալով իր՝ շաքարավազի մենաշնորհի մասին բերած օրինակին, ասաց. «Շաքարավազի գործարանը Հայաստանում միակն է, այս պահին երկրորդ գործարան չկա: Գործող օրենքի շրջանակում այս գործարանն իր գործունեությամբ չի համարվում մենաշնորհ: Այսինքն` փաստացի միակն է, բայց չի համարվում մենաշնորհ: Եվ որպեսզի իրականությունն ու օրենքն իրար համապատասխանեն, անհրաժեշտ է, որ մենաշնորհի կարգավիճակը ստանա, բայց ոչ թե արտոնությունների, այլ հավելյալ պարտավորություններ դնելու համար: Որովհետև երբ կազմակերպությունը չի համարվում մենաշնորհ, նրա նկատմամբ չես կարող կիրառել հակամենաշնորհային գործիքներ»:

Արծվիկ Մինասյանն ընդգծեց, որ ինքը նույն Արծվիկ Մինասյանն է, ինչ խորհրդարանում էր և իր համոզմունքները չեն փոխվել ու չեն փոխվելու:

«Ես նշանակված եմ Դաշնակցության առաջադրմամբ, և այն մոտեցումները, որոնք առաջ է տանում Դաշնակցությունը, ես շարունակում եմ, որպես նախարար, առաջ տանել: Գուցե աշխատելու ոճը պետք է փոխել, որովհետև այլ է պառլամենտում, այլ է գործադիրում, բայց համոզմունքները նույնն են»,- եզրափակեց նախարարը: