Որևէ մեկը Սամվել Բաբայանին չի էլ ժխտում. Ստեփան Մարգարյան (տեսանյութ)
Երեկ Արցախ էր այցելել Լեռնային Ղարաբաղի Հանրապետության պաշտպանության նախկին նախարար Սամվել Բաբայանը, ում Ստեփանակերտում դիմավորեցին հազարավոր քաղաքացիներ:
Քաղաքացիները ԼՂՀ իշխանություններից պահանջում էին պաշտպանության նախարար նշանակել Սամվել Բաբայանին:
Բաբայանի այցի, ՀՀ իշխանության հայտարարությունների և այլ հարցերի շուրջ Newspress.am-ը զրուցեց ԱԺ պատգամավոր Ստեփան Մարգարյանի հետ:
Մարգարյանի կարծիքով` Արցախում տեղի ունեցածն ու ժողովրդի պահանջն ինքնաբուխ էր, որովհետև հավաքված մարդկանց վերաբերմունքն անկեղծ է եղել:
Դիտարկմանը, թե իշխանությունը հայտարարում է, թե իբր իր համար միևնույն է Սամվել Բաբայանի այցը, և յուրաքանչյուր ոք կարող է գալ և գնալ, Ստեփան Մարգարյանն ասաց. «Շատ կարևոր էր Սամվել Բաբայանի այցելությունն ու հրապարակային հայտարարությունները: Նա հայտարարում է, որ անհանգիստ է ստեղծված իրավիճակի համար և համարում է, որ ստեղծված իրավիճակին ադեկվատ չեն կատարվող գործողությունները և ադեկվատ չէին դրանք շատ վաղուց: Սա երևում էր նաև իր նամակից, որը գրել էր 2013-ին»:
Ըստ Մարգարյանի` կարևորն այն է, որ Սամվել Բաբայանը հայտարարում է, որ չի եկել ինչ-որ մեկից պաշտոն ստանալու, այլ եկել է ժողովրդի կողքին լինելու համար, թե որքանով կհաջողվի, դա կախված է նաև իշխանությունների պահվածքից:
Հարցին, թե իշխանությունը, այդ թվում նաև` ԼՂՀ իշխանության որոշ ներկայացուցիչներ, հայտնում են, որ հայրենիքը պաշտպանելու համար պարտադիր չէ պաշտոն ունենալը, այդ դեպքում, ինչպե՞ս կարող է օգտակար լինել հայրենիքին Սամվել Բաբայանը, Ստեփան Մարգարյանը պատասխանեց. «Նա պաշտոններ չի էլ ուզում: 2013-ին, երբ գրում էր նամակը, էլի պաշտոնի մասին չէր ասում: Նա ասում է, որ իր դիտարկումները ցույց են տալիս, որ սա է պետք, որևէ մեկը դա չի էլ ժխտում»:
Առավել մանրամասն` տեսանյութում:
