Ստորագրահավաքով բանակի ճակատագիր չեն լուծում. Վահրամ Բաղդասարյանը` Սամվել Բաբայանի մասին (տեսանյութ)
ԱԺ ՀՀԿ խմբակցության ղեկավար Վահրամ Բաղդասարյանն այսօր խորհրդարանում լրագրողների հետ զրույցում անդրադարձավ Սամվել Բաբայանի` Արցախ կատարած այցին և արցախցիների պահանջին, այն է` ԼՂՀ պաշտպանության նախարար նշանակել Սամվել Բաբայանին:
ՀՀԿ խմբակցության ղեկավարի խոսքով` պաշտոնը չէ, որ պարտավորեցնում է մարդուն իր փորձն ու ներուժն օգտագործել հայրենիքի պաշտպանության գործում. «Ես ողջունում եմ ազգային հերոսների վերադարձը, մանավանդ նման պատկառելի անցյալ ունեցող մարդկանց վերադարձը: Ինձ թվում է, որ յուրաքանչյուր մարդ, եթե իր մեջ ունի ուժ ու փորձ, նա դա կարող է օգտագործել իր երկրի պաշտպանության համար: Պաշտոնը չէ, որ պետք է պարտավորեցնի, դա ԼՂՀ կամ ՀՀ քաղաքացի լինելն է պարտավորեցնում»:
Հարցին, թե Արցախի խորհրդարանի պատգամավոր, «Ազգային վերածնունդ» կուսակցության նախագահ Հայկ Խանումյանին ծեծի ենթարկելը կարո՞ղ է կապ ունենալ նրա նախաձեռնած ստորագրահավաքի հետ, որով պահանջում էր ԼՂՀ պաշտպանության նախարար նշանակել Սամվել Բաբայանին, Վահրամ Բաղդասարյանը պատասխանեց, որ ինքը դեռևս մանրամասներին չի տիրապետում, սակայն ծեծի ենթարկելը կարող է տարբեր պատճառներ ունենալ. «Տարբեր պատճառներ կարող է ունենալ, կարող է լինել սադրանք, սակայն ես չեմ կարծում, որ Ղարաբաղի իշխանության կողմից նման նախաձեռնություն լինի»:
ՀՀԿ խմբակցության ղեկավարն այդ միտքը որակեց ծիծաղելի:
Առավել մանրամասն` տեսանյութում:
