Լույսերն անջատում ա, գլուխը կոխում ա վերմակի տակ ու իր անձնական կարծիքն ա արտահայտում. Ազատ Արշակյան (տեսանյութ)
ՀՀԿ-ական Լեռնիկ Ալեքսանյանը և ԳԽ նախկին պատգամավոր Ազատ Արշակյանը անդրադարձել են ԼՂՀ ԱԺ պատգամավոր Հայկ Խանումյանին ծեծի ենթարկելու դեպքի վերաբերյալ` ԱԺ փոխխոսնակ Էդուարդ Շարմազանովի` «քիթ խոթել» չխոթելու մեկնաբանությանը:
«Ես չեմ ցանկանում մեկնաբանել Շարմազանովի խոսքերը: Խառնվել, գնահատական տալ ժամանակից շուտ, երևույթը շատ տգեղ է և դատապարտելի»: Հիշեցնենք, որ Էդուարդ Շարմազանովն ասել էր, որ թող քաղաքական ուժերը հանգիստ նստեն տեղները և քթները չխոթեն Արցախի ներքին կյանքին:
Հանրապետական պատգամավորի խոսքին հակադարձում է ԳԽ նախկին պատգամավոր Ազատ Արշակյանը. «Ղարաբաղը Հայաստան է, և դրա նկատմամբ մենք պետք է ունենանք հատուկ վերաբերմունք: Այնտեղի քաղաքական գործիչները, զինվորականները, մարդիկ չափազանց մեծ պատասխանատվություն են կրում, նրանք պատասխանատու են Արցախի նկատմամբ: Տեղի ունեցածը դատապարտելի է, և թե’ Արցախի, թե’ Հայաստանի հանրապետությունները պետք է գտնեն և, անշուշտ, պատժեն նրան, ով հաշվեհարդար է տեսել ԼՂՀ ԱԺ քաղաքական գործչի հետ: Իսկ եթե դա պրովակացիա է, ուրեմն ՀՀԿ-ն նույնպես պետք է դատապարտի` մարմնի ցանկացած մասով»:
ՀՀԿ-ական պատգամավորը հորդորեց ավելորդ տեղը եղածը չլայնացնել, քանի որ երևույթը պետք է հասկանալ, նոր գնահատական տալ. «ԱԺ փոխնախագահ կլինի, ով կլինի, իր կարծիքն է ընդամենը, ի՞նչ է, փոխնախագահն իրավունք չունի սեփական կարծիք ունենալու»,- նշեց Լեռնիկ Ալեքսանյանը:
«Եթե ԱԺ փոխնախագահն անձնական կարծիք ունի, թող լույսերն անջատի, պատուհանները փակի, գլուխը կոխի վերմակի տակ և անձնական կարծիք արտահայտի»,- Հանրապետական Լեռնիկ Ալեքսանյանին հակադարձեց Ազատ Արշակյանը:
Բանախոսներն անդրադարձան նաև Բունդեսթագի որոշմանն ու քաղաքական զարգացումներին: Լեռնիկ Ալեքսանյանը կարևորեց Բունդեսթագի որոշումը` ընդգծելով, որ սա բացառիկ դեպք էր: Ազատ Արշակյանն այս դեպքում համաձայնեց Լեռնիկ Ալեքսանյանի հետ, միայն թե մտահոգություն հայտնեց, որ ՀՀԿ-ի ապաշնորհ, քթով մռթով քարոզիչները կմսխեն այս հաղթանակը:
