Արտագաղթողները պարտք ունեն զոհված տղաների հիշատակի առջև. Նիկոլ Փաշինյան

2015 թվականի բյուջեի կատարողականում կա ամեն ինչ, սակայն չկա ռազմավարություն: Այս մասին ԱԺ ամբիոնից հայտնեց ՀԱԿ խմբակցության պատգամավոր Նիկոլ Փաշինյանը.

«2015 թվականի պետական բյուջեի կատարողականը նախորդ տարիների կատարողականների նման հուսահատ ու տխուր փաստաթուղթ է, այստեղ կան թվեր, տոկոսներ, անկումներ և նույնիսկ աճեր, բայց, ինչպես նախորդ տարիներին, չկա ամենակարևորը՝ ռազմավարություն, թե մենք ինչպիսին ենք ուզում դարձնել մեր տնտեսությունը»:

Պատգամավորն ասաց, որ 2015 թվականին ՀՀ-ի խղճուկ` 3 տոկոսանոց աճի 70 տոկոսն ապահովվել է գյուղատնտեսության հաշվին, և գյուղատնտեսության աճն էլ կառավարության խոստովանությամբ մեծապես պայմանավորված է բնակլիմայական բարենպաստ պայմաններով. «Այսինքն` եթե 2015 թվականին 2 կարկուտ ավելի գար, 2 անձրև պակաս, մեր երկրի 3 տոկոսանոց տնտեսական աճը 50 տոկոսով կկրճատվեր»,- ասաց Փաշինյանը:

Փաշինյանի խոսքով՝ պոմիդորով հնարավոր չէ հակառակորդի ագրեսիայի դեմ պայքարել, իսկ դա նշանակում է, որ ՀՀ իշխանության ղեկին պետք է լինեն ոչ թե այն մարդիկ, որոնց ուշքումիտքը պոմիդորի միջազգային գներն են, ովքեր երազում են, որ ՀՀ-ում էլ իսրայելական նորագույն զենք լինի,այլ նրանք, ովքեր Հայաստանը տեսնում են որպես բարձր տեխնոլոգիական, ինդուստրիալ երկիր:

Անդրադառնալով ԳԱԱ նախագահ Ռադիկ Մարտիրոսյանի հայտնի հարցազրույցին, որտեղ վերջինս Հայաստանը «քոսոտ» երկիր էր անվանել` Փաշինյանն ասաց.  «80 տարեկան մարդուն ԳԱԱ-ի նախագահի պաշտոնում պահելը, կնշանակի` ԳԱԱ-ն դատապարտել քոսոտ լինելու հեռանկարին»:

Նիկոլ Փաշինյանի խոսքով՝ քառօրյա պատերազմից հետո արտագաղթի նկատմամբ ՀՀ-ի վերաբերմունքը պետք էր փոխել, և այնուամենայնիվ ժողովուրդն իրեն պետք է հարց տա՝ քառօրյա պատերազմի ընթացքում այդ 18 տարեկան տղաները զոհվեցին, որ Հայաստանը շարունակվի՞ դատարկվել. «Պարզ է, որ գնացողները մտածում են հետևյալ կերպ, որ այստեղ այլևս հնարավոր չէ, բայց արդյոք Ռոբերտ Աբաջյանը, Արմենակ Որֆանյանը, Քյարամ Սլոյանը մարտի ժամանակ մտածել են, որ շատ դժվար է, և այստեղ այլևս հնարավոր չէ, արդյոք իրենց ծնողներին մեղադրե՞լ են, որ 10 տարի առաջ չեն արտագաղթել Եվրոպա, որպեսզի իրենք ոչ թե խրամատներում լինեին, այլ «Շանզե-Լինզե»-ի կաֆեներում՝ սուրճ ըմբոշխնելիս, բնականաբար, չեն մտածել այդպես, հակառակ դեպքում այդպիսի արարքների ընդունակ չէին լինի»,- ասաց նա՝ հավելելով, որ արտագաղթողները պարտք ունեն այս տղաների հիշատակի առջև: