ՀԲ-ի կողմից ճնշո՞ւմ կա նման Հարկային օրենսգիրք ընդունելու համար. Նաիրա Զոհրաբյանը՝ Վախթանգ Միրումյանին

Կառավարության առընթեր պետական եկամուտների կոմիտեի նախագահի տեղակալ Վախթանգ Միրումյանն այսօր Ազգային ժողովում ներկայացրեց Հարկային օրենսգրքի փոփոխությունների նախագիծը:

ԲՀԿ խմբակցության ղեկավար Նարիա Զոհրաբյանին հետաքրքրում էր այն, որ ԱԺ տնտեսական հարցերի մշտական հանձնաժողովի ՀՀԿ-ական (Վարդան Այվազյան.- խմբ.) նախագահը լրջորեն քննադատել է Հարկային օրենսգրքի նախագիծը: Պատգամավորը հարցրեց, թե արդյոք կա՞ կոռուպցիոն ռիսկեր և պարտադրանք Համաշխարհային բանկի կողմից` հաշվի առնելով այն, որ Հայաստանի արտաքին պարտքը հատել է ՀՆԱ-ի 50 տոկոսի շեմը:

Միրումյանը պատասխանեց պատգամավորին, որ քննարկումները կմեկնարկեն, որոնց ընթացքում կուսումնասիրվեն ռիսկերը, եթե այդպիսիք կան, ապա կմեղմվեն. «Եթե մենք առաջարկում ենք, որ բոլոր հակադրությունները, երկիմաստություններն էականորեն նվազեցվեն, ապա դա ոչ այլ ինչ է, քան կոռուպցիոն ռիսկերի նվազեցում: Հարկային պարտավորություններն իրականացնելիս նվազեցնում է շփումը հարկային տեսուչների հետ, ապա դա կոռուպցիոն ռիսկերի նվազեցում է: Մենք պատրաստ ենք քննարկել, միգուցե կհաջողվի այդ ռիսկերը փարատել, իսկ եթե ոչ՝ մենք այդ ռիսկերը կքննարկենք և համապատասխան լուծումներ կգտնենք»:

Անդրադառնալով Նաիրա Զոհրաբյանի երկրորդ հարցին, այն է, թե կա ճնշում միջազգային կառույցների և մասնավորապես Համաշխարհային բանկի կողմից նման Հարկային օրենսգիրք ընդունելու համար, Միրումյանը պատասխանեց, որ անկախ նրանից, թե պետական պարտքի սպասարկման խնդիր կա, թե ոչ, Հարկային օրենսգիրքը պարտքի սպասարկման համար կոչված չէ.

«Անկախ փաստաթղթերի ընդունումից արտաքին պարտքը սպասարկում և սպասարկվում է, նման մտավախություն չկա»,- ասաց Միրումյանը:

Արձագանքելով` Նաիրա Զոհրաբյանը կրկնեց հարցը. «Համաշխարհային բանկի կողմից եղե՞լ է պոզիտիվ պրեսինգ հարկերն ավելացնելու և եթե իսկապես այն բերում է կոռուպցիոն ռիսկերի նվազեցման, ինչո՞ւ են տնտեսվարողները լուրջ ռիսկեր տեսնում, մազոխի՞ստ են»:

Միրումյանն ասաց, որ ճնշում չկա ավել հարկեր հավաքագրելու համար, դա պարզապես բխում է մեր շահերից:

Ինչ վերաբերում է Համաշխարհային բանկին, ապա, ըստ Միրումյանի, այն կարող է միայն խորհուրդ տալ, բայց ոչ պարտադրել: