109 մլրդ դրամը «բազեաբուծական» ծախս է. Լևոն Զուրաբյան

ՀԱԿ-ը կողմ կլիներ 2015 թվականի բյուջեի 109 մլրդ դրամ ավելացումներին, եթե դրանք արվեին բյուջեի ակտիվացման նպատակով կամ պետական պատվերներ լինեին նոր զինատեսակներ մշակելու և գնելու նպատակով, սակայն այդ ծախսերը կառավարական ծախսեր են, որոնցից տնտեսությունն օգուտ չի քաղել, դրանք «բազեաբուծական » ծախսեր են: Այս մասին ԱԺ ճեպազրույցների ժամին հայտարարեց ՀԱԿ խմբակցության ղեկավար Լևոն Զուրաբյանը:

Պատգամավորը նշեց, որ վարչապետ Հովիկ Աբրահամյանը համաձայնել է քննադատությանը, սակայն նշել է, որ այդ ավելացումները ոչ թե պահուստային ֆոնդի հաշվին է արվել, այլ հաստատվել է Ազգային ժողովի կողմից:

«Մի կողմ թողնենք այն, որ ԱԺ-ն հենց այնպես չի հաստատել այդ ծախսերը, բայց այլ հարց է ծագում. հիմա կառավարությունն աշխատում է 2016 հաստատված բյուջեի կանոններով, մյուս կատարողականի ժամանակ կարող են գալ ու ասել, որ սա էլ ԱԺ-ի հաստատածն է: Դրա համար ես առաջարկում եմ, որ եթե կառավարությունը հաստատում է, որ շտկելու տեղ կա, ապա եկեք արտահերթ քննարկումով 2016 թվականի բյուջեն վերանայենք` հաշվի առնելով նոր իրողություններն ու մարտահրավերները, որոնցում հայտնվել է Հայաստանը:
Եթե դա չեն անում, ստացվում է, որ չեն ընդունում այն, որ Հայաստանը հայտնվել է նոր մարտահրավերներում և ոչ մի բան չեն ցանկանում շտկել»,- ասաց Զուրաբյանը:

Անդրադառնալով ընտրական պրոցեսներին` Զուրաբյանը տեղեկացրեց, որ կոնսուլտացիաներ են ընթանում իշխանության, այլ խմբակցությունների, ԱՄՆ դեսպանի, ԵՄ ներկայացուցչի, քաղաքացիական հասարակության, Մեծ Բրիտանիայի, Շվեյցարիայի, Ֆրանսիայի, Ճապոնիայի, ռուսաստանյան շրջանակների հետ. «Հուսով եմ, որ կոնսոլիդացիաների արդյունքում լուրջ արդյունք կունենանք, որը հիմք կդնի ինչ-որ բեկումնային զարգացումների համար »,- ասաց նա: