Սերգո Կարապետյանը գյուղնախը կառավարելու համար դիմո՞ւմ է 6-րդ վարչության աշխատակիցներին

ՀՀ գյուղատնտեսության նախարարության պաշտոնական կայքում նշվում է, որ ՀՀ ԳՆ Երկրագործության գիտական կենտրոնը կազմակերպվել է 1926 թվականին:

Գիտական կենտրոնն իր գործունեության տարիներին մեծ ավանդ է ներդրել Հայաստանում գյուղատնտեսական գիտության զարգացման և արտադրությունում գիտության նվաճումների ներդրման գործում:

Ներկայումս գիտական կենտրոնում տեսական ու կիրառական բնույթի բազմատեսակ աշխատանքներ են իրականացվում սելեկցիայի, սերմնաբուծության բաժիններում, ագրոքիմիայի և կենսաքիմիայի լաբորատորիաներում: Ուսումնասիրությունները տարվում են աշնանացան ցորենի և գարու, հատիկաընդեղեն մշակաբույսերի համաշխարհային հավաքածուի ուսումնասիրության, ընտրասերված սորտերի արդյունավետ տեխնոլոգիայի մշակման, ձմեռադիմացկուն, պառկելու և հիվանդությունների նկատմամբ կայուն, բարձր բերքատու սորտերի ստեղծման, գյուղատնտեսական արտադրության ոլորտում օգտագործվող պեստիցիդների մուտագեն ակտիվության, պեստիցիդների և ֆիզիոլոգիական ակտիվ նյութերի համատեղ ազդեցության մեխանիզմի պարզաբանման ուղղությամբ:

Միջազգային կազմակերպությունների հետ համագործակցության արդյունքում վերջին տասնամյակում շրջանացվել է աշնանացան ցորենի 6, աշնանացան գարու 6 և սիսեռի 4 սորտեր: Պետական սորտափորձարկման է ներկայացվել աշնանացան ցորենի 5, սիսեռի 3, սոյայի 2 և ոլոռի 1 սորտ և այլն:

Սովորաբար, այս և մի քանի ոլորտային ՊՈԱԿ-ներ Խորհրդային միության շրջանից մնացած կենտրոններ են, որոնք ժամանակին գործել են իրենց ողջ հզորությամբ, սակայն անկախության շրջանում, մեծամասամբ ֆինանսներ, նաև իրացվելու և արտադրության տարածման սահմանափակության, նաև մասնագետների պակասի, չնչին աշխատավարձի հետևանքով պարզապես գոյություն էին քարշ տալիս:
Սակայն, ինչպես ասում են, մարմանդ ջրից վախեցիր:

Այսօր «Հրապարակ» թերթը գրել է, որ երկու օր առաջ ոստիկանության կազմակերպված հանցավորության դեմ պայքարի (6-րդ) վարչության աշխատակիցներն այցելել են Էջմիածնում գտնվող գյուղատնտեսության նախարարության «Երկրագործության գիտական կենտրոն» ՊՈԱԿ, աշխատակիցներին տարել ոստիկանություն և մինչև ուշ երեկո պահել այնտեղ:

Որոշ շրջանառվող լուրերի համաձայն՝ հնարավոր է` իրավապահները հենց գյուղնախարարի խնդրանքով են այցելել հիմնարկ:

Նշենք, որ այն, ինչ նշվում է գյուղնախարարության կայքում պետք է մոտենալ մեծ վերապահումով, քանի որ միջազգային համագործակցություն, շրջանցված ցորեն, գարի և այլն, երևի թե պատրաստված է միայն կայքի և նախարարության ՓիԱր-ի համար, իսկ իրականությունն այն է, որ ինչպես նմանօրինակ այլ ՊՈԱԿ, «Երկրագործության գիտական կենտրոնը» ևս զբաղված է ամեն ինչով, բացի գյուղատնտեսական գիտությանը ծառայելուց:

Եթե ճիշտ են լուրերը, թե գյուղնախարարի խնդրանքով են այցելել հիմնարկ, ապա պարզապես նախարարը չի կարողանում ղեկավար իր կառույցը և ստիպված դիմում է նման միջոցների, իսկ եթե տեղեկությունը մի փոքր այլ է, ապա «Երկրագործության գիտական կենտրոնի» աշխատաոճը եզակի չէ գյուղնախում և նախարարը երևի թե ստիպված կլինի 6-րդ վարչության աշխատակիցներին հերթով ուղեգրել նախարարության ՊՈԱԿ-ներ և ստորաբաժանումներ: