Ես հիմա նստեմ զուգարանների քարտեզագրմա՞մբ զբաղվեմ. Մեխակ Ապրեսյան (տեսանյութ)

Զբոսաշրջության ամառային սեզոնն արդեն բացված է. ի՞նչ է առաջարկում Հայաստանն օտարերկրյա զբոսաշրջիկներին, և ինչպե՞ս ոլորտը դարձնել առավել գրավիչ ու մրցունակ: «Անդրադարձ» մամուլի ակումբում այս հարցերին փորձեց պատասխանել Հ Հ էկոնոմիկայի նախարարության Զբոսաշրջության զարգացման քաղաքականության վարչության պետ Մեխակ Ապրեսյանը:

Մեխակ Ապրեսյանը նշեց, որ այս տարի բացի դասական ճանաչողական ուղղվածությունից, առաջարկում են նաև այլ ծրագրեր, ավելի արկածային և երիտասարդական: Նա նշեց, որ Հայաստանում արդեն զարգանում է նաև ձմեռային զբոսաշրջությունը:

Նախորդ տարի զբոսաշրջության նպատակով Հայաստան է այցելել 1մլն 292 հզր զբոսաշրջիկ, ինչը 1%-ով պակաս է եղել 2014թ. ցուցանիշի համեմատ: Համեմատելով հարևան Վրաստանի զբոսաշրջության հետ` Մեխակ Ապրեսյանն ասաց, որ Հայաստանն այնքան էլ չի զիջում Վրաստանի զբոսաշրջության: Ըստ Վրաստանի պաշտոնական հրապարակման` 2015-ին Վրաստան է այցելել 5 մլն 800 հազ մարդ, որից 2 մլն 281 հազարը զբոսաշրջության նպատակով:

Անդրադառնալով հանրային զուգարանների մասով լրագրողների պնդումներին, թե Հայաստանում զուգարաններ չկան, որոնք, կամա թե ակամա, տուրիզմի զարգացման մաս պետք է կազմեն, Ապրեսյանն արձագանքեց.

«Ես կարծում եմ` դա մասնավոր հատվածի բիզնեսը պետք է լինի, օրինակ` բենզալցակայանները և գազալցակայանները պետք է ունենան իրենց զուգարանները, միաժամանակ դա կստիպի ունենալ հաճախորդներ»:

Ի վերջո լրագրողների պնդմանը, թե Երևանից Դիլիջան հատվածում զուգարան չկա, Ապրեսյանը հակադարձեց. «Թունելի մոտ կա, և ի վերջո ես հիմա չեմ նստի զուգարանի քարտեզագրմամբ զբաղվեմ»:

Մեխակ Ապրեսյանն այդուհանդերձ նշեց, որ այս տարի ակնկալվում է զբոսաշրջության 5 տոկոս աճ, չնայած ապրիլին մի շարք զբոսաշրջային չեղարկումներ եղան, բայց մայիսից ամեն ինչ ավելի հուսադրող է:

Մանրամասները` տեսանյութում: