«Ժամանակ». Կազանյան պլանը վերակենդանանո՞ւմ է. դա՞ է պայմանը, որ Ադրբեջանը չի կրակում

«Ժամանակ» թերթը գրում է.

«Ռուսաստանի արտգործնախարարությունը երեկ հաղորդագրություն է տարածել փոխարտգործնախարար Կարասինի և Ֆրանսիայի դեսպանի, ու Մինսկի խմբի համանախագահներից ֆրանսիացի համանախագահի հետ հանդիպման մասին, որում խոսվել է նաև ղարաբաղյան հարցով եռակողմ գագաթնաժողովի նախապատրաստության մասին: Ըստ հաղորդագրության՝ գագաթնաժողովը տեղի է ունենալու Սանկտ Պետերբուրգում:

Թե ինչ գագաթնաժողովի մասին է խոսքը, ովքեր են մասնակցելու՝ դեռևս խոսք չկա, սակայն փորձագետներն արդեն իսկ ենթադրում են, որ խոսքը հավանաբար վերաբերում է Պուտին-Սարգսյան-Ալիև գագաթնաժողովին, հունիսյան հանդիպմանը, որի վերաբերյալ արդեն իսկ հայտարարվել էր, սակայն որի ժամկետներն ու վայրը դեռևս չեն հստակեցվել:

Այսպիսով, եթե Սանկտ Պետերբուրգի գագաթնաժողովը վերաբերելու է Սարգսյան-Ալիև հանդիպմանը՝ Պուտինի մասնակցությամբ, ապա դա հարց է առաջացնում, թե արդյո՞ք դա կնշանակի Ռուսաստանի գլխավորությամբ եռակողմ ֆորմատի վերականգնում, որն առկա էր 2010 թվականից, և որն ավելի հայտնի դարձավ, այսպես ասած, Կազանյան պլանով: Այս տեսանկյունից, իհարկե, ապրիլյան պատերազմից հետո զարգացան բավական հակասական իրադարձություններ:

Ինչպես հայտնի է, որոշակի ակտիվություն ցուցաբերեց ՌԴ վարչապետ Մեդվեդևը, որը հենց այդ եռակողմ ֆորմատի նախագահողն էր, այդ եռակողմ ֆորմատը ձևավորվեց հենց նրա՝ ՌԴ նախագահության տարիներին: Ավելին՝ մայիսի 20-ին ԵՏՄ վարչապետների գագաթնաժողովի համար ժամանելով Երևան, Մեդվեդևն ավելի մեծ շեշտադրումներ էր արել հենց ղարաբաղյան թեմատիկայի վրա՝ Սարգսյանի հետ առանձին հանդիպելով այդ հարցի համար:

Այդ ընթացքում, իհարկե, տեղի ունեցավ Վիեննայի հանդիպումը, որից հետո ՌԴ արտգործնախարար Լավրովը հայտարարել էր, որ դա ամերիկյան նախաձեռնություն էր՝ միաժամանակ ասելով, որ Ռուսաստանը կշարունակի կողմերի միջև փոխզիջումներ որոնել: Եվ նաև օրերս Ադրբեջանի նախագահը Բեռլինում Անգելա Մերկելի հետ հանդիպումից հետո հայտարարել էր, որ Ռուսաստանն իրենց ռազմավարական գործընկերն է, և հույս ունեն, որ Հայաստանին կհամոզի «վերադարձնել» տարածքները:

Նշանակո՞ւմ է սա արդյոք, որ Ռուսաստանը հերթական անգամ ձեռնամուխ է լինում իր պլանի իրագործմանը, որի բովանդակությունը Սերժ Սարգսյանը բացեիբաց ներկայացրել էր «Բլումբերգ» գործակալությանը ապրիլի 23-ին տված հարցազրույցում: Խոսքն Ադրբեջանին մի քանի շրջան հանձնելու, խաղաղապահների տեղակայման մասին էր, ընդ որում՝ Ղարաբաղի անորոշ կարգավիճակի դեպքում: Այդ պլանը վերադառնո՞ւմ է, թե՞ վերադառնում է որոշակի փոփոխված տարբերակը կամ մոդեռնիզացված, որի մասին հայտնել էր Լավրովը Վիեննայի հանդիպումից հետո:

Եվ սա՞ է պայմանը, որ Ադրբեջանը չի կրակում՝ սպասելով, որ Մոսկվան համոզի Հայաստանին: Ինչքա՞ն ժամանակով է այդ պայմանը, ե՞րբ է լրանալու Ադրբեջանի սպասելու ժամանակը, կամ ե՞րբ է Ռուսաստանը Բաքվին հերթական անգամ գրոհ սկսելու ազդանշան տալու՝ Սանկտ Պետերբուրգի հանդիպումից հետո՞, թե՞ Ռուսաստանը պլանավորում է մի քանի հանդիպում ևս:

Եվ ինչ է անելու այս իրավիճակում Արևմուտքը, սպասելու են, որ Ռուսաստանի պլանը տարածաշրջանը նորի՞ց հասցնի պատերազմի, թե՞ պարզապես Արևմուտքը հույս ունի այդ միջոցով արագացնել հրադադարի մեխանիզմների ներդրումը, իսկ դրանից հետո արդեն վերցնել նախաձեռնությունը՝ արդեն որոշակիորեն երաշխավորված լինելով պատերազմի բռնկումից»:

Մանրամասները՝ թերթի այսօրվա համարում