Անդրանիկ Մարգարյանն այսօր կդառնար 65 տարեկան

Այսօր՝ հունիսի 12-ին, հայ հասարակական-քաղաքական գործիչ Անդրանիկ Մարգարյանը կդառնար 65 տարեկան: Ծնվել էր Երևանում 1951-ին:

Մարգարյանը 1967-1972 թթ. սովորել է Երևանի պոլիտեխնիկական ինստիտուտի տեխնիկական կիբեռնետիկայի ֆակուլտետում, որտեղ ստացել է հաշվիչ մեքենաների ինժեների որակավորում։

1968 թվականից եղել է խորհրդային տարիներին ընդհատակյա գործող Ազգային միացյալ կուսակցության անդամ, 1973 թվականից՝ ԱՄԿ խորհրդի անդամ։ 1974 թվականին ձերբակալվել է և դատապարտվել երկամյա բանտարկության՝ խորհրդային վարչակարգի դեմ պայքարելու մեղադրանքով։

1992 թ. անկախ Հայաստանում դառնում է երկրի առաջին գրանցված կուսակցության անդամ, որի խորհրդի նախագահն է 1993 թվականից մինչև իր մահը։ 1993-1997 և 1998-2005 թթ.՝ ՀՀԿ խորհրդի նախագահ։ 1997-1998 թվականներին եղել է ՀՀԿ նախագահ, 2005 թվականին դարձյալ ընտրվել է ՀՀԿ նախագահ, 1998 թվականից Երկրապահ կամավորական միության անդամ էր, այնուհետև՝ ԵԿՄ վարչության անդամ։

1995 թ. ընտրվել է ԱԺ առաջին գումարման պատգամավոր: 1999 թ. ընտրվել է ԱԺ պատգամավոր, ղեկավարել «Միասնություն» խմբակցությունը:

2000թ-ից ՀՀ վարչապետն էր: Անդրանիկ Մագարյանը որպես վարչապետ շարունակում է պաշտոնավարել նաև 2003 թ. ՀՀ ԱԺ ընտրություններից հետո՝ ղեկավարելով ընտրությունների արդյունքում ձևավորված կոալիցիոն կառավարությունը:

Պարգևատրվել է մի շարք կոչումներով. ՀՀ նախագահի հրամանագրով պարգևատրվել է Սուրբ Մեսրոպ Մաշտոց շքանշանով, ՀՀ ՊՆ «Վազգեն Սարգսյան» մեդալով, ՀՀ ՊՆ «Գարեգին Նժդեհ» մեդալով, ԵԿՄ «Վազգեն Սարգսյան» շքանշանով, ՀՀ Ոստիկանության «Արամ Մանուկյան» մեդալով, Ֆ. Նանսեն հիմնադրամի «Ֆ. Նանսեն» մեդալով:

Հանկարծակի մահը վրա է հասնում 2007-ի խորհրդարանական ընտրություններից առաջ, երբ Մարգարյանը գործող վարչապետ էր: Մարտի 25-ն էր, 2007 թվականը:

Անդրանիկ Մարգարյանի մարմինն ամփոփված է Երևանի Պանթեոնում: Ամեն տարի բազմաթիվ քաղաքական գործիչներ, ընկերներ և պարզապես հասարակ քաղաքացիներ այցելում են նրա շիրմին, ծաղիկներ խոնարհում, լուռ կանգնում ու հեռանում…