Նույնն է, որ մարդկանց ասեք՝ ձուկը թանկացել է, սև իկրա կերեք. Նիկոլ Փաշինյան

ԱԺ ՀԱԿ խմբակցության պատգամավոր Նիկոլ Փաշինյանը Հարկային օրենսգրքի նախագծի քննարկման բարձրաձայնեց մի քանի պաշտոնական թիվ, համաձայն որոնց՝ ՀՀ-ում կա 615 հազար վարձու աշխատող, այսինքն՝ մարդիկ են, ովքեր աշխատում են և վճարում հարկեր և նրանցից 204 հազարը պետական բյուջետային աշխատողներ են, որոնք, ըստ էության, հարկատուներ չեն, քանի որ նրանց աշխատավարձը գոյանում է ուրիշների հարկերից:

«Ստացվում է, որ 361 հազար ակտիվ հարկատու կա` գումարած 50-54 հազար անհատ ձեռներեց: Մեր բյուջե այս մարդկանցից է հարկ գնում, և հիմա փոխանակ պետությունն ամեն ինչ անի՝ նրանց թիվն ավելացնելու համար, ըստ էության, անում է այն, որ նրանց թիվը տարեցտարի պակասում է, իսկ հարկային բեռն ավելանում է»,- ասաց Փաշինյանը:

Պատգամավորի խոսքով՝ թվում է, թե անհատ ձեռներեցների վերաբերյալ պետությունն ինչ-որ քայլ է արել, և շրջանառության հարկը բարձրացրել է մինչև 115 միլիոն, սակայն այժմ հիմնական զեկուցողն ասում է, թե դեռ այն ժամանակ են ասել, որ այս քայլը ժամանակավոր է, և շեմը պետք է իջնի ու դառնա 40 միլիոն:

Փաշինյանն ընդգծեց, որ հարկ վճարող 361 հազար մարդկանց վրա արդեն իսկ 525 հազար թոշակառուների թոշակի վճարման բեռը կա, իսկ 2018 թվականից էլ ավելանում է 5 տոկոս պարտադիր կուտակային վճարը:

«Կառավարությունն ասում է՝ հա, մենք օղու վաճառքը չեն խրախուսում: Այսինքն՝ էս մարդիկ Նոր տարի չեն անելու, ծնունդ չեն անելու և իրենց հյուրի դիմաց մի շիշ արաղ չեն դնելու, ինչ է` պետությունով ընկել եք էս մի շիշ օղու հետևից»,- ասաց Փաշինյանը:

Իսկ ԱԺ փոխնախագահը (Հերմինե Նաղդալյանը-խմբ.) սենսացիոն եզրահանգում է անում և ասում է՝ խմեք թարմ օղի և քշեք հեծանիվ, բեռներն էլ էշով կտեղափոխենք, չէ՞, վարուցանք էլ գութանով անենք, չէ՞, միջքաղաքային տրանսպորտն էլ ֆայտոնով ենք անելու, Երևան-Ռոստով ամենօրյա լյուքս դասի ֆայտոն է լինելու: Թարմ օղին ու գինին մեկուկես անգամ ավելի թանկ է, նույնն է, որ մարդկանց ասեք՝ ձուկը թանկացել է, սև իկրա կերեք»,- շարունակեց Փաշինյանը: