Պատվաստումների ոլորտում գյուղնախարարության կոռուպցիան աչք է ծակում

ՀՀ վերահսկիչ պալատն ուսումնասիրել է ՀՀ գյուղատնտեսության նախարարության կողմից «Գյուղատնտեսական կենդանիների պատվաստում» ծրագիրը` երկու բաղադրիչներով՝ Կենսապատվաստուկների ձեռք բերում և Հակաանասնահամաճարակային միջոցառումների կազմակերպում:

Նշենք, որ պետպատվերի շրջանակներում իրականացվում է բրուցելոզ, տուբերկուլոզ, սիբիրախտ, դաբաղ, խշխշան պալար, պաստերեկյող, բրադզոտ, դասական ժանտախտ, վարրոատոզ հիվանդությունների գծով:

Նշենք, որ անընդհատ շեշտվում է, որ կենդանիների հաշվառում չկա, սակայն ազգային վիճակագրական ծառայությունն ավելի ճարպիկ է այս հարցում և կարողացել է քիչ թե շատ հաշվառել կենդանիներին, իսկ թե ինչու Գյուղատնտեսության նախարարությունը հաշվառել չի կարողանում, որ հենց իր գործն է, սակայն ԱՎԾ-ն կարողանում է, այլ հարց է:

Այսպես, 2015թ-ին պատվաստուկների ձեռքբերման և հակաանասնահամաճարակային միջոցառումների համար ծախսվել է 1,162,214.8 հազ. դրամ:

ՎՊ-ն հաղորդում է, որ իրականացված վերահսկողության ընթացքում բացահայտվել են դեպքեր, երբ համայնքների կողմից հաշվարկված անասնագլխաքանակի վերաբերյալ տեղեկատվությունը չի համապատասխանել տվյալ համայնքում փաստացի առկա անասնագլխաքանակի մասին տվյալներին:

ՀՀ գյուղատնտեսության նախարարության անասնաբուժության վարչությունից վերահսկողության ընթացքում պահանջվել են հակահամաճարակային միջոցառումների իրականացման և անհրաժեշտ պատվաստանյութերի ձեռք բերման հաշվարկների վերաբերյալ հիմնավորումներ: Սակայն, 2014-2015թթ. համար ներկայացվել են իրարամերժ տեղեկություններ, այսպես՝ օրինակ, տրամադրված տեղեկանքներում խոշոր եղջերավոր կենդանիների` կովերի ծինը հաշվարկվել է 2014թ. 80%-ով, իսկ 2015թ. 90%-ով: Դաբաղ հիվանդության նկատմամբ մանր եղջերավոր կենդանիներն ամբողջությամբ չեն պատվաստվում, օրինակ՝ առկա են համայնքներ, որտեղ մանր եղջերավոր կենդանիների մի մասը պատվաստվում են, իսկ մյուս մասը` ոչ, այստեղ բացակայում է ցանկացած տրամաբանություն:

01.01.2014թ. դրությամբ պահեստում առկա են եղել գումարով 35,538.2 հազ.դրամի և 01.01.2015թ-ի դրությամբ՝ 27,286.4 հազ. դրամի պատվաստանյութեր, ախտորոշիչ և լաբորատոր նյութեր, սակայն, դրանք հաշվի չեն առնվել հաջորդ տարվա ծրագրի բյուջեն կազմելու ընթացքում:

Այսինքն` հակահամաճարակային միջոցառումների իրականացման և անհրաժեշտ պատվաստանյութերի ձեռք բերման հաշվարկների վերաբերյալ կարգ գոյություն չունի, կամ պլանավորման դաշտը կարգավորված չէ:

Այսպիսով, հակահամաճարակային միջոցառումների իրականացման և անհրաժեշտ պատվաստանյութերի ձեռքբերման հաշվարկների վերաբերյալ կարգ գոյություն չունի, կամ պլանավորման մասով դաշտը կարգավորված չէ: Պլանավորման հիմքում ընդունվում են ՀՀ ազգային վիճակագրության ծառայության կողմից տրամադրված տվյալները, որոնք ձևավորվում են տարեկան մեկ անգամ կատարված հաշվառման արդյունքներով. ՀՀ ազգային վիճակագրության ծառայությունը տարվա ընթացքում անասնագլխաքանակի գծով տեղի ունեցող շարժի վերաբերյալ տվյալներ չի ստանում: Տարեվերջին պահեստում առկա պատվաստանյութերի, ախտորոշիչ և լաբորատոր նյութերի մնացորդները հաշվի չեն առնվել հաջորդ տարվա ծրագրի բյուջեն կազմելու ընթացքում: Սա գյուղնախարարության կողմից կոռուպցիայով զբաղվելու լավագույն դրսևորումն է:

Նշենք նաև, որ անասնաբույժի կողմից ստացված պատվաստանյութերը մինչև միջոցառումների իրականացումը պահպանվել է սեփական նկուղում, սառնարան չունենալու պատճառով, հետևաբար համայնքում պատվաստանյութերի պահպանման պայմանների ոչ լիարժեք ապահովման պատճառով վտանգվում են պատվաստանյութերի որակական հատկանիշները: