Էդ ի՞նչ վարկեր են, օրինակ` Սուրբ Սերժ ամենափրկիչ եկեղեցու կառուցման համա՞ր. Նիկոլ Փաշինյան

Խորհրդարանում քննարկվում է Հայաստանի Հանրապետության և Վերակառուցման և զարգացման միջազգային բանկի միջև 2016 թվականի մայիսի 12-ին ստորագրված «Էներգետիկայի ոլորտի ֆինանսական առողջացման ծրագիր» վարկային համաձայնագիրը:

Նախագծի հիմնական զեկուցող, Էներգետիկայի և բնական պաշարների նախարարի տեղակալ Արեգ Գալստյանը տեղեկացրեց, որ ըստ համաձայնագրի՝ Հայաստանի Հանրապետությանը տրամադրվելու է 30 մլն ԱՄՆ դոլար գումարի չափով վարկ:

ՀԱԿ խմբակցության պատգամավոր Նիկոլ Փաշինյանը, հիշեցնելով վերջին 3 տարում էլեկտրաէներգիայի սակագնի թանկացումները` ասաց, որ թանկացումները միշտ հիմնավորվում են նույն բառապաշարով, որով ներկայացվում է վարկը. «Ճեղքվածք ու թերվճարում կա, պարտքեր ունեն ատոմակայանին ու ՋԷԿ-ին, հոսանքի գինը բարձրացվում էր, որ մենք` սպառողներս, ավելի վճարենք, որպեսզի ՀԷՑ-ը վճարի այն պարտքը, որն ունի Երևանի ՋԷԿ-ին, Հրազդանի ատոմակայանին, մյուս արտադրողներին: Սակագները բարձրացրել ենք, որ ճեղքվածքը փակենք, հիմա էլ ճեղքվածի համար վարկ ենք վերցնում»,- ասաց նա:

Պատգամավորին հետաքրքրում էր, թե ինչպե՞ս է ստացվել, որ Հայաստանի էլեկտրաէներգիա արտադրողների, օրինակ` ատոմային էլեկտրակայանի ու Երևանի ՋԷԿ-ի նկատմամբ ՀԷՑ-ը պարտքեր է կուտակել, բայց ոչ մի պարտք չի կուտակել Հրազդանի ՋԷԿ-ի, Հրազդանի հինգերորդ բլոկի, Սևան-Հրազդան կասկադի նկատմամբ, որոնց հետ համագործակցության կապեր ունի.

«Եվ երրորդը, ասում եք` գործունեության հետ չկապված վարկեր, միջոցներ են ներգրավվել, էդ ի՞նչ վարկեր են, ինչի՞ համար են ներգրավել, էստեղ էլ գործ ունենք, երբ, օրինակ, Հովիկ Աբրահամյանի խնդրանքով «բարեգործական» նպատակով եկեղեցու կառուցման համար փող են փոխանցել, օրինակ` Սուրբ Հովհաննես Ամենափրկիչ կամ Սուրբ Սերժ ամենափրկիչ եկեղեցու կառուցման համա՞ր, էդ ի՞նչ գործունեության հետ չկապված վարկեր են»,- հարցրեց նա:

Փոխնախարարը պատգամավորի հարցին ի պատասխան ասաց, որ մի քանի տարվա ընթացքում այդ երկու պետական ձեռնարկություններին առաջարկել են կատարել ոչ իրենց բնույթին բնորոշ գործունեություն: Նրա խոսքով՝ օրինակ` «Նաիրիտ» և Վանաձորի «Քիմպրոմ» գործարաններին, որպեսզի նաև այդ ընկերությունների աշխատակիցների վարձավճարները տան, տարիների ընթացքում բավական մեծ գումարներ են կուտակվել, որոնց վերադարձը հնարավոր կլինի միայն վարկային եղանակով:

Փոխնախարարը նաև նշեց, որ ատոմակայանի տուրբոգեներատորներից մեկը որոշ ժամանակով չի աշխատել, կապիտալ վերանորոգման անհրաժեշտություն կարիք է եղել, և այդ չարտադրված էլեկտրաէներգիան նույնպես ատոմակայանն արտադրել է ամենաէժան էլեկտրաէներգիաներից.

Փաշինյանն արձագանքելով` նկատեց, որ ՀԾԿՀ-ն հոսանքի սակագնի` երեք տարի անընդմեջ բարձրացումը պայմանավորում էր 23 միլիարդ դրամ արժողությամբ ֆինանսական ճեղքով.

«Հիմա այդ ճեղքից 12 միլիարդը Երեւան ՋԷԿ-ի պարտքն էր, որը ՀԷՑ-ն էր նրան պարտք, 7 միլիարդը՝ ատոմակայանի պարտքը, 80 և ավելի տոկոսով այդ ճեղքն ատոմակայանի ու ՋԷԿ-ի պարտքն էր, հոսանքը մենք 3 տարի ավելացված սակագնով վճարեցինք, որ պարտքը մարվի, հիմա մեր տված փողերն ո՞ւր են գնացել, որ ատոմայանի ու ՋԷԿ-ի պարտքը չի փակվել, հիմա էլ նույն պարտքի համար վարկ եք վերցնում 30 միլիոն դոլար»,- հարցրեց նա:

Հիմնական զեկուցողը չհամաձայնեց պատգամավորի հետ և ներկայացրեց տվյալներ պարտքի մասին առ այն, որ Երևանի ՋԷԿ-ը՝ 32 միլիարդի պարտք, ինչ վերաբերում է առևտրային պարտքերին, ապա այն 6,5 միլիարդ դրամ է, շուրջ 39 միլարդ պարտք էլ ունեն «Գազպրոմ Արմենիայի» նկատմամբ: