Ե՞րբ է իշխանություններին շնորհակալություն հայտնելու ժամանակը

Երկու օր առաջ ՀՀ վարչապետ Հովիկ Աբրահամյանն այցելել է «Հրազդան ցեմենտ» գործարան, ծանոթացել ընթացիկ աշխատանքներին և առաջիկա ծրագրերին:

Ըստ Newspress.am-ի տեղեկությունների` վարչապետն առանձնազրույց է ունեցել «Հրազդան ցեմենտի» ղեկավարի հետ, այնուհետ հեռացել է գործարանի տարածքից:

Նշենք, որ «Հրազդան ցեմենտի» էլմատակարարումն անջատված էր և միայն վերջերս են միացրել:

Չի բացառվում, որ վարչապետը քննարկել է «Հրազդան ցեմենտ» ՓԲԸ-ին հարկային և պարտադիր սոցիալական ապահովագրության վճարների գծով առաջացած տույժերից ազատելու մասին» ԱԺ ընդունած օրինագիծը:

Նշենք, որ «Հրազդան-ցեմենտ» ընկերությունն ազատվել է շուրջ 504 միլիոն 923 հազար դրամ ընդհանուր գումարի չափով տույժերից: Գործարանը նախկինում պատկանում էր գործարար Միխայիլ Բաղդասարովին, սակայն ունեցած պարտքերի դիմաց այն անցավ «ՎՏԲ-Հայաստան» բանկին: Ըստ որոշ տեղեկությունների՝ իշխանությունները ցանկանում են պարտքերից ազատել գործարանը, այն գայթակղիչ դարձնել և հնարավորինս բարձր գնով վաճառել:

Այնուհետև վարչապետը հանդիպել է Հրազդանի Կենտրոն թաղամասի բազմաբնակարան շենքերի բնակիչների հետ և հետաքրքրվել նրանց հուզող խնդիրներով: Հրազդանցիներն առաջնահերթ են համարել շենքային բակերի, տանիքների և վերելակների վերանորոգումը, ջրային ներքին ցանցի բարելավումը, բնակֆոնդի պահպանումը, աշխատատեղերի ստեղծումը և այլ հարցեր: Վարչապետն արձագանքել է, թե կառավարությունն առաջիկայում կքննարկի և միջոցներ կհատկացնի Հրազդանին: Հովիկ Աբրահամյանը նաև հանձնարարել է Հրազդանի քաղաքապետին՝ ուշադրության կենտրոնում պահել քաղաքի խնդիրները և հետևողական լինել դրանց լուծման հարցում:

Հավելենք, որ Հրազդանն անբարեկարգ է, և այն խնդիրները, որ բարձրացրել են հրազդանցիները միշտ էլ եղել են: Իսկ թե ինչո՞ւ այդ խնդիրներին ուշադրություն դարձնելու համար պետք էր, որ վարչապետը հասնի Հրազդան, այլ հարց է: Նշենք նաև, որ Հրազդանի քաղաքապետ Արամ Դանիելյանը հավերժ է, քաղաքի խնդիրները ևս: Հրազդանի միակ քաղաքապետ Դանիելյանին զուգահեռ` խնդիրները չեն պակասել և այդ դեպքում ո՞ւմ են պետք Հրազդանի քաղաքապետի ընտրությունները, եթե ժամանակ առ ժամանակ վարչապետը կգա, հրազդանցիները կասեն իրենց խնդիրների մասին, վարչապետն էլ երևի թե կլուծի:

Իհարկե, եթե վարչապետն իր յուրաքանչյուր այցերն ուղեկցի` լուծելու տվյալ քաղաքի կամ համայնքի այս կամ այն խնդիրը, ապա որևէ տեղ չի էլ այցելելու, այս անգամ պարզապես անհրաժեշտ էր «Հրազդան ցեմենտի» հետ քննարկել որոշ հարցեր և հընթացս էլ հետաքրքրվեց հրազդանցիների խնդիրներով, որոնք այնքան հին են, որքան Հրազդանը:

Եթե Հրազդան քաղաքի բյուջեով փորձեն լուծել քաղաքի բարձրացրած հարցերը, ապա ոչ ընտրությունների, ոչ էլ սեփական գրպանի փող չի էլ մնա: Իսկ խնդիրները մարդկանց միտքը սուր են պահում, չեն թողնում, որ մարդիկ ընկնեն թմբիրի մեջ` ինչպես արևելքում կամ կյանքի կենսապայմանների լավացումը մարդկանց դարձնում է կամ թմրամոլ, կամ խաղամոլ: Կգա երևի թե այն ժամանակ, երբ իշխանություններին կարելի է շնորհակալություն հայտնել` թմրամոլ, խաղամոլ չդառնալու, ինչպես նաև թմբիրի մեջ չընկնելու համար: