Մխիթարյանի՝ «Մանչեսթեր» տեղափոխվելու գործարքը կայացել է. Daily Mirror

Անգլիական «Մանչեսթեր Յունայթեդը» Դորտմունդի «Բորուսիայի» հետ համաձայնեցրել է Հայաստանի ազգային հավաքականի և դորտմունդյան ակումբի կիսապաշտպան Հենրիխ Մխիթարյանի տեղափոխության հարցը: Այդ մասին գրում է Daily Mirror պարբերականը՝ հավելելով, որ տրանսֆերի գործարքը կարժենա 40 միլիոն եվրո:

Մխիթարյանի գործող պայմանագիրը դորտմունդցիների հետ ավարտվում է հաջորդ տարի, սակայն «մեղուները» տևական ժամանակ հրաժարվում էին հայազգի կիսապաշտպանին բաց թողնելուց՝ նրա տրանսֆերը վաճառելու դիմաց պահանջելով 40 միլիոն եվրո:

«Մանչեսթեր Յունայթեդն» ավելի վաղ հանդես էր եկել 25, ապա և 34 միլիոն եվրոյի առաջարկություններով, սակայն դորտմունդցիները մերժել էին այդ առաջարկները:

Ֆուտբոլիստի գործակալ Մինո Ռայոլան այսօր հայտարարել էր, որ իրենք միևնույնն է, չեն հանձնվելու:

Հիշեցնենք նաև, որ Մխիթարյանի ծառայություններով հետաքրքրված էր անգլիական չորս ակումբ՝ «Մանչեսթեր Յունայթեդը», Լոնդոնի երեք թիմերը՝ «Չելսին», «Արսենալը» և «Տոտենհեմը», ինչպես նաև Թուրինի «Յուվենտուսը»: