Հայաստանը դարձյալ պատրաստ չէր Լարսի արտակարգ իրավիճակին

Վարչապետ Հովիկ Աբրահամյանն ասել է, որ ՀՀ տրանսպորտի և կապի նախարար Գագիկ Բեգլարյանը կմեկնի Վրաստան` Վերին Լարսի ճանապարհի հետ կապված:

Վարչապետը դիմել է նաև ՌԴ կառավարության ղեկավարին՝ Դմիտրի Մեդվեդևին, ինքնաթիռ է տրամադրել և արդեն կազմակերպվել է 200 քաղաքացու վերադարձը Երևան:

Նշենք, որ արդեն մեկ շաբաթ է, որ հարյուրավոր ՀՀ քաղաքացիներ առանց սննդի և ջրի, կիզիչ արևի տակ են սպասում էին Լարսի անցակետում:

Հիշեցնենք, որ հորդառատ անձրևներից առաջացած սողանքավտանգ իրավիճակի և Թերեք գետի վարարման պատճառով 1 շաբաթից ավելի է` փակվել է Վերին Լարսի անցակետը. բեռնատարներն ու ՀՀ քաղաքացիները մնացել են փակուղում:

Թեև Հայաստանը Լարսի առումով ոչինչ ձեռնարկել չի կարող, սակայն հնարավոր էր ՀՀ քաղաքացիներին մեկ շաբաթ չթողնել արևի ու անձրևի տակ` առանց ծածկի և սննդի: Թեև ՀՀ քաղաքացիները Ռուսաստանի միջոցներով արդեն ՀՀ-ում են, սակայն մեքենաների, բեռնատարների մասին իրավիճակն անհայտ է:

Եթե օտար երկրում քաղաքացիները խնդիրներ ունեն, ապա հայրենիքը միշտ պատրաստ է աջակցելու և օգնելու. սա է յուրաքանչյուր երկրի պարտականությունն իր երկրի քաղաքացիների նկատմամբ:

Նման իրավիճակներ հաճախ է պատահում, և ամեն անգամ պարզվում է, որ Հայաստանը պատրաստ չէր, արտակարգ դեպքն անսպասելի էր և կազմակերպչական աշխատանքները երկու ոտքով կաղում են:

Հետո էլ կարծես սովորություն է դարձել յուրաքանչյուր արտակարգ իրավիճակի, ֆինանսական խնդիրների դեպքում կամ դիմել ժողովրդին` աջակցության համար, կամ էլ դիմել, օրինակի համար ՌԴ-ին: Իսկ կառավարությո՞ւնը: Կառավարությունը ո՞ր օրվա համար է, որ ամեն անգամ անպատրաստ է լինում արտակարգ իրավիճակներում աշխատելու համար և դիմում է սրա նրա օգնությանը:

Հիմա էլ Գագիկ Բեգլարյանին է Հովիկ Աբրահամյանն ուղարկում Լարս, որ ի՞նչ անի: Պարզապես կառավարությունը սովորել է հանգիստ մտածել ու աշխատել, և յուրաքանչյուր նման ցնցում կառավարությանը կտրում է մտազբաղ վիճակից. դե մարդկանց ռուսները կբերեն, բեռները «Սպայկան» կտեղափոխի, օսեթները կկերակրեն հայերին. կառավարությանը մնաց անհանգստությունը` ոչնչից:

Newspress.am