Սահմանամերձ գյուղերի 1255 բնակիչ նամակով դիմել է Սերժ Սարգսյանին

«Դեմ ենք սահմանամերձ համայնքների միավորմանը» քաղաքացիական նախաձեռնությունն օրեր առաջ նամակով դիմել էր ՀՀ նախագահ Սերժ Սարգսյանին՝ համայնքների խոշորացման ծրագրում Կոթի, Բարեկամավան և Ոսկեպար գյուղերը չընդգրկելու համար:

Ստորև ներկայացնում ենք ՀՀ Տավուշի մարզի սահմանամերձ Կոթի, Ոսկեպար, Բարեկամավան համայնքների թվով 1255 բնակիչների դիմում-նամակը Հայաստանի Հանրապետության նախագահ Սերժ Սարգսյանին.

«Մեծարգո պարոն նախագահ.

Վերը նշված համայնքների ներքոստորագրյալ, թվով` 1255 քաղաքացիներս (համայնքներում փաստացի բնակվող չափահաս բնակչության մոտ ութսուն տոկոսը), դիմում ենք Ձեզ հետևյալ խնդրանքով:

«Հայաստանի Հանրապետության վարչատարածքային բաժանման մասին» Հայաստանի Հանրապետության օրենքում փոփոխություններ կատարելու մասին օրենքի նախագծով, որը երկրորդ ընթերցմամբ ընդունվեց ԱԺ-ում, խոշորացման ենթակա համայնքների շարքում հայտնվեցին նաև հակառակորդի դիրքերից ուղիղ նշանառության տակ գտնվող և պարբերաբար գնդակոծվող սահմանապահ համայնքները: Համայնքների խոշորացման ծրագրի քննարկման նախնական փուլերում, ոլորտի մասնագետների հավաստմամբ, գոնե մոտ ապագայում, սահմանամերձ համայնքների խոշորացում չէր նախատեսվում: Օրինագիծն անակնկալ էր սահմանամերձ գյուղերի բնակչության համար. բնակիչներից ոչ ոք այդ մասին տեղեկացված չէր, և մարդիկ իրենց համայնքների ամբողջական կառուցվածքը փոփոխության ենթարկող օրենքի մասին իմացան ԱԺ նիստերի հեռարձակման ընթացքում:

Ներքոստորագրյալ քաղաքացիներս գտնում ենք, որ կառավարությունը «Հայաստանի Հանրապետության վարչատարածքային բաժանման մասին» Հայաստանի Հանրապետության օրենքում փոփոխություններ կատարելու մասին օրենքի նախագիծը ներկայացրել է ԱԺ` խախտելով ՀՀ Սահմանադրության մի շարք հոդվածներ, մասնավորապես 183 և 190 հոդվածներն արժանի են դիտարկման: Կարծում ենք նաև, որ խախտվել է «Տեղական հանրաքվեի մասին» Հայաստանի Հանրապետության օրենքի 7-րդ հոդվածը: Օրինագիծը ԱԺ-ում ներկայացվելուց առաջ, սահմանամերձ համայնքներում չեն կայացել տեղական հանրաքվեներ, չի ծավալվել որևիցե մի համայնքային նշանակության քննարկում: Դիմելու ենք նաև ՀՀ Մարդու իրավունքների պաշտպանին` մասնագիտական եզրահանգում ստանալու խնդրանքով:

Մեր մտահոգությունները ոչ միայն պայմանավորված են օրենքի խախտման հետ կապված մեր տպավորություններով, այլ նաև սահմանամերձ` ընդհուպ սահմանին ամենամոտ համայնքների ներգրավմամբ: Չլինելով ոլորտի մասնագետներ` չենք համարում, որ համայնքների խոշորացումն անարդյունավետ է, և ինքներս մեկ այլ նախաձեռնությամբ կդիմենք Ձեզ` սահմանամերձ համայնքների խոշորացման խնդրանքով , եթե ոչ ռիսկային տարածաշրջաններում խոշորացված համայնքները մեկ- երկու տարի հետո ապացուցեն իրենց կենսունակությունն ու բարեկեցություն ապահովեն ներհամայնքային բնակավայրերի բնակչության համար: Քանի դեռ գործնականում ապացուցված չէ համայնքների խոշորացման ծրագրի արդյունավետությունը, խնդրում ենք, որպես փորձնական ծրագիր, չընդգրկել սահմանամերձ` կրակի տակ գտնվող համայնքները:

Ծանոթանալով լիազոր ներկայացուցչի պարտավորություներին` ունենալով մտահոգություններ, որ փոքր համայնքները չեն ունենա բավարար քանակով ավագանիներ, չեն ազդի որոշումների ընդունման վրա, մենք նպատակահարմար ենք համարում ՏԻՄ-երի առկայությունը սահմանամերձ համայնքներում: Համայնքային բյուջեների համաչափ տնօրինման մեխանիզմների բացակայությունը, ծրագրերի ուղղորդման հետ կապված հնարավոր կամայական մոտեցումների վտանգը, սահմանամերձ գյուղերում հերթապահության կազմակերպման մեխանիզմի անորոշությունը, բնակչության շրջանում առկա անհանգստությունը և դրանից բխող արտագաղթի հնարավոր ռիսկերն ու մի շարք այլ մտահոգություններ, ստիպում են դիմել Ձեզ համայնքների խոշորացման ծրագրում, Կոթի, Բարեկամավան և Ոսկեպար գյուղերը չընդգրկելու խնդրանքով:

Newspress.am-ին բնակիչները հայտնեցին, որ նույնաբովանդակ մի նամակ էլ ուղղել են Մարդու իրավունքների պաշտպանին: Ըստ Կոթի գյուղի բնակիչ Արմեն Մելիքյանի՝ Մարդու իրավունքների պաշտպանի գրասենյակից իրենց տեղեկացրել են, որ նամակն առայժմ քննարկման փուլում է, բայց քանի որ խնդիրը շատ հրատապ է, առաջիկա մի շաբաթվա ընթացքում նամակին պատասխան կտրվի:

Newspress.am-ը կապ հաստատեց նաև Մարդու իրավունքների պաշտպանի մամուլի խոսնակ Զոհրապ Եգանյանի հետ, ով հայտնեց, որ մոտ օրերս նամակի պատասխանը կուղարկվի համայնքների բնակիչներին: Հավելենք, որ պատասխան նամակը Newspress.am-ը կհրապարակի: