«Ո′չ Սերժ Սարգսյանն է Դ’ Գոլ, ո′չ Ալիևը՝ Ադենաուեր». Արման Նավասարդյան (տեսանյութ)
Ռուս-թուրքական հարաբերությունների զարգացումն արդի աշխարհաքաղաքական գործընթացներում: Հայաստանի դիվանագիտության խնդիրները: Այս հարցերի մասին «Անդրադարձ» մամուլի ակումբում լրագրողների հետ զրուցեց արտակարգ և լիազոր դեսպան Արման Նավասարդյանը:
«7 ամիս անցավ, և մեր հասարակությունն անասելի բերկրանք ապրեց` կապված ռուս-թուրքական հարաբերությունների պետական մակարդակով կատարված էրոզիայի հետ: Երբ հարաբերությունները վատացան, մեր հասարակությունն անասելի հրճվանք ապրեց, իսկ հիմա, երբ հակառակն է, ընկել ենք խորը հուսահատության մեջ: Որպեսզի հասկանայինք, թե ինչ է կատարվում, ես հարցին կմոտենայի աշխարհաքաղաքական խնդիրների տեսանկյունից:
Թուրքիայի քաղաքականությունը ձախորդություններ ունի իսլամական և արաբական աշխարհի ուղղությամբ, նա ցանկանում էր դառնալ լիդեր, բայց չստացվեց: Այդ ձախորդություններն առավել նկատելի են Սիրիայում և Իրաքում: Այդ բոլորը վերջացավ նրանով, որ Էրդողանը խոցեց ինքնաթիռը և ընկավ տնտեսական և քաղաքական այնպիսի իրավիճակի մեջ, որ սողեսող էլ կգնար Մոսկվա` շտկելու համար իրավիճակը: Դավիթօղլուից հետո արվեց մի հետաքրքիր հայտարարություն, որ մենք թշնամիներ չենք կարող լինել Ռուսաստանի, Իսրայելի և Եգիպտոսի հետ: Թուրքիայի համար ամենամեծ խնդիրը, «Աքիլեսյան գարշապարը» Սիրիայի հարցն է»:
Արման Նավասարդյանը նշեց, որ Ռուսաստանի համար կարևոր է Թուրքիայի հետ հավասարակշռել հարաբերությունները, որպեսզի առաջին հերթին ապահովի իրենց Թուրքիայի ոտնձգություններից. «Ռուսաստանը ցանկանում է, որ Թուրքիան կա′մ իր հետ լինի, կա′մ իրեն չխանգարի սիրիական խնդիիրների հարցում: Իսկ Թուրքիան հիմա այն իրավիճակում է, որ պետք է ընտրություն կատարի Ռուսաստանի և ԱՄՆ-ի միջև»:
Արման Նավասարդյանի կարծիքով` ռուս-թուրքական հարաբերությունները Հայաստանի վրա որևէ դրական կամ բացասական ազդեցություն չեն ունենա, առավելագույնը որ կարող է լինել, սահմանի հարաբերական անդորրն է:
Մանրամասները ՝ տեսանյութում
