Կառավարությունը 4000 դոլարանոց անիվներով գնում է երկինք

Երբ հայտարարվեց, որ Հայաստանի կառավարությունը` ի դեմ գլխավոր պայքարող Հովիկ Աբրահամյանի, պայքարելու է կոռուպցիայի դեմ, շատերը լուրջ չընդունեցին, մտածեցին` ապրիլմեկյան կատակ է:

Քանի որ ապրելով Հայաստանում` հասկանում են` հնարավոր չէ ապրել ամսական թեկուզ 150-200 հազար դրամ աշխատավարձով, էլ չենք խոսում, որ երկրի բնակչության մի հատվածը ստանում է նվազագույն` 55 հազար դրամ աշխատավարձ: Հետո էլ ասում են` մի գողացիր: Աստվածաշնչյան պատվիրաններն ի չիք են դառնում Հովիկ Աբրահամյանի ղեկավարած կառավարության ծրագրերի գաղափարների առջև:

Իհարկե, չի կատարվում նաև «մի′ ստիր» պատվիրանը, քանի որ առանց ստի անհնար է. կառավարությունից հաճախ ասում են` փող չկա, բոլորը գիտեն, որ ստում են, քանի որ նույն ժամանակահատվածում, օրինակ, կարող են 4000 դոլար փող տալ և գնել ընդամենը 4 հատ անվադող: Այստեղ աստվածաշնչյան պատվիրանը տեղ չունի:

Չնայած դա է պատճառը, որ Հայաստանում համառորեն եկեղեցիներ են կառուցվում, քանի որ, հարուստ, թե մեծահարուստ, հասկանում են, որ թաղվել են ստախոսության ճահճում և մխիթարություն գտնում են եկեղեցիներում: Ի դեպ, այդ եկեղեցիները կառուցվում են` հաճախ ոչ իրեն գրպանի փողերով: Ենթադրվում է, որ անգամ Բարձրյալը չի ցանկանա ստախոսությամբ, կաշառքով և արցունքով թաթախված փողերով սուրբ տաճար կառուցվի:

Ինչևէ: Կարող ենք քրիստոնյա մնալ Հայաստանում, իրոք դժվար է, քանի որ անգամ պատվիրանները կատարելու կարողությունը չունենք, իսկ թե կառավարությունն ինչ պետք է հնարի, որ Բարձրյալի մոտ արդարանա. «Դե կոռուպցիայի դեմ էի պայքարում, մեքենայիս անվադողեր էին պետք, ախր ես մեղավո՞ր եմ, որ հարուստ եմ, ու իմ մեքենայի արժեքը 200 000 դոլար է, հո է՞շ չէի քշի, պիտի լավ մեքենա քշեմ, որ ինձ հարգեն, մեզ հարգեն»:

Կարճ ասած` մի բան կհնարեն: Բայց մինչև այդ պահը, կառավարությունն` ի դեմ Հովիկ Աբրահամյանի, պայքարում է կոռուպցիայի դեմ` արտառոց ձևերով:

Գուցե կոռուպցիայի դեմ պայքարում Հայաստանը հաջողություններ չգրանցի, սակայն երկրային հաճույքներից հրաժարվելու ցանկություն կառավարությունը չունի, թեև երկնքում այդ պրոցեսը ճիշտ չեն հասկանա, սակայն կարևորն այսօրն է, իսկ Բարձրյալին կփորձեն հայավարի համոզել` «դե փող չկար, դե ամեն ինչ թանկ էր, դե մենք հարստացել էինք ազնիվ ճանապարհով, դե բյուջեն ծախսում էինք` ժողովրդի մասին մտածելով, դե ժողովուրդն աղքատ էր իր խելքից, բայց փոխարենը մենք եկեղեցի ենք կառուցել` այն էլ ինչքան, դե մեր մեքենային 4000 դոլարանոց անիվներ էին պետք, մենք մեղավոր չենք, ախր շատ թանկ են արտադրում: Թողություն տուր մեր մեղքերին, քանզի խաբել ենք, խաբում ենք, բայց դեռ պիտի խաբենք»:

Կառավարությունը 4000 դոլարով 4 հատ անիվ է պատրաստվում գնել: Հետո էլ ասում եք` կոռուպցիայի դեմ պայքար չկա, պետական միջոցներն անարդյունավետ են ծախսվում: Եթե անարդյունավետ ծախսվեին, 4 անիվի համար կառավարությունը կծախսեր 40 հազար դոլար: Եթե երկու չաշխատող բիոզուգարանի համար ծախսել են 325 հազար դոլար: Այնպես որ` կառավարությունը, կարելի է ասել, ընդհանրապես ծախս լուրջ ծախս չի արել այդ անիվների վրա:

Newspress.am