Լյուդմիլա, Արևմուտքը վատ բան չի. թեժ բանավեճ նախկին ու ներկա պատգամավորների միջև (տեսանյութ)

Մոսկվան մտադիր է զենքի վաճառքի նոր պայմանագրեր կնքել Բաքվի հետ: Ինչպե՞ս է Երևանը վերաբերում Ռուսաստանի կողմից Ադրբեջանին սպառազինություն վաճառելու երևույթի մասին: Թեմայի մասին «Անդրադարձ» մամուլի ակումբում խոսեցին ՀԱԿ խմբակցության անդամ Լյուդմիլա Սարգսյանը և նախկին պատգամավոր Ազատ Արշակյանը:

«Ինչ վերաբերում է Մոսկվայի զենքի վաճառքին` մենք որևէ կերպ այդ քաղաքականության վրա ազդել չենք կարող: Ռուսաստանը զենք վաճառող երկիր է, և դրանով ուզում է այս կամ այն տարածաշրջանի վրա իր ուժն ի ցույց դնել: Նա շարունակելու է զենք վաճառել Ադրբեջանին, և Ադրբեջանը շարունակելու է անհրաժեշտ պահին կրակել Հայաստանի վրա: Ես չեմ կարծում, որ ղարաբաղա-ադրբեջանական հակամարտությանն արագ է լուծվելու, կարծում եմ, որ և′ Հայաստանը, և′ Արցախը շատ վտանգված են լինելու: Տվյալ դեպքում Ռուսաստանը Հայաստանի հետ բարեկամ մնալով` փորձում է բարեկամ մնալ նաև Ադրբեջանի հետ: Նման դեպքում մեր երկիրը պետք է կարողանա սեփական քաղաքականությունը վարել և ինքնուրույն քայլեր անել»,- ասաց ՀԱԿ խմբակցության անդամ Լյուդմիլա Սարգսյանը:

Խոսելով ինքնուրույն քայլեր անելու հնարավորությունից` Ազատ Արշակյանը նկատեց, որ մենք թերագնահատում ենք մեր հնարավորությունները, քանի որ միշտ մեզ պարտադրել են, որ մենք չենք կարող ինքնուրույն որոշում կայացնել:

«Մենք իրականում թերագնահատում ենք մեր հնարավորությունները: Մեզ պարտադրել են և սովորեցրել, որ մենք չենք կարող ինքուրույն որոշում կայացնել: Մենք կարող ենք ունենալ ռազմաարդյունաբերական համալիր և արտադրել մրցունակ զենք: Դրա համար պետք է ունենալ քաղաքական իշխանություն և քաղաքական կամք: Կառավարությունը մեր հնարավորությունները չափում է իր անձնական պոտենցիալով: Մենք պետք է իշխանությունը ձևավորենք` նկատի ունենալով մեր մարտահրավերները: Կարող ենք ընտրել անվտանգության այն համակարգը, որը համընկնում է մեր շահերի հետ: Ռուսաստանը բոլորովին վերջերս թարմացրեց Լենին-Աթաթուրք դաշինքը: Ռուսաստանը վերադարձել է իր իմպերիական ծրագրերի մեջ: Հիմա Ռուսաստանը Հայաստանին համարում է թերարժեք պետություն: Ասում է` 100 կմ իմ սահմաններից դուրս իմ անվտանգության գոտին է, այսինքն` մեր երկիրը անվտանգության գոտի է: Ռուսաստանը մեզ լիարժեք պետություն չի համարում: Ռուսական իմպերիան որևէ մեկին դաշնակից չի կարող լինել, իսկ զենք-զինամթերք մատակարարում է Ադրբեջանին, քանի որ պարտավոր է»:

ՀԱԿ խմբակցության Անդամ Լյուդմիլա Սարգսյանն էլ նկատեց, որ մեր տարածաշրջանով հետաքրքրված են գերտերությունները:

«Ռուսաստանի կողմից Ադրբեջանին զենք վաճառելը, ինչ խոսք, մեզ վրա ազդում է հոգեբանորեն»,- խոստովանեց Լյուդմիլա Սարգսյանը:

Ազատ Արշակյանն իր հերթին հորդորեց սիրել Արևմուտքը. «Լյուդմիլա ջան, Արևմուտքը վատ բան չի»:

Մանրամասները` տեսանյութում