Պավլիկ ջան, դու ինձ հիշում ես. Տեր-Գուլանյանը դիմեց Պավել Մանուկյանին (տեսանյութ)

Գրող, հրապարակախոս Մերուժան Տեր-Գուլանյանն այսօր «Անդրադարձ» մամուլի ակումբից խորհրդով դիմեց ՊՊԾ գունդը գրաված Սասնա ծռեր խմբի անդամ Պավլիկ Մանուկյանին:

«Պավլիկ ջան, դու ինձ հիշում ես: «Գարունի» ամբողջ կազմով քո մոր, քո հրաշալի մայրիկի և քույրիկի ձեռքից հաց ենք կերել: Ուստի որպես հին ընկեր, ծանոթ` խորհուրդ եմ տալիս քեզ` հանձնվեք, զենքը հանձնեք, ազատ արձակեք պատանդներին: Խնայեք ոչ միայն պատանդների, այլ ձեր կյանքը նույնպես: Դուք դեմ եք դուրս եկել պետությանը, իսկ ամենաքաղաքակիրթ երկրում անգամ, երբ պետության դեմ ոտնձգություն է տեղի ունենում, գիտեք` ինչպես է վերջանում: Դա, որքան հասկանում եմ, մեր իշխանությունները չեն ուզում, որովհետև այսքան երկար բանակցությունները շարունակվում են, և լավ է, որ այդպես է: Ձեր հայտարարություններից ելնելով` դուք նույնպես դա չեք ուզում: Արյունն արդեն թափվել է: Այն միտքը, թե հասարակությունը կհավաքվի, իշխանափոխություն կլինի, մոռացեք, չի լինելու այդ բանը, որովհետև ձեր և հասարակության արանքում արյուն կա և այդ արյունը մեր տղայի արյունն է, որը պակաս հերոս չէր և պակաս չէր կռվել ղարաբաղյան առաջին պատերազմում: Նկատի առեք, իսկ արյունը պարապ խոստումներով և ջրիկ խոսքերով չես լվանա: Արյունը պատասխանատվություն է պահանջում»,- ասաց Տեր-Գուլանյանը:

Մանրամասները` տեսանյութում