Հովիկ Աբրահամյանը հայելի չունի

Ասում են` վարչապետ Հովիկ Աբրահամյանի դիրքերն ակնհայտ խախտվել են: Ասում են՝ վարչապետն արձակուրդ չի գնալու: Ասում են՝ այնքան է մտահոգ երկրի տնտեսության դառը վիճակով, որ գիշերներն էլ է լուսացնում կառավարությունում: Ասում են՝ երկրի տնտեսության անմխիթար, կոռումպացված վիճակից մազերը նախօրոք թափվել էին:

Երկրի վարչապետը երկրի ֆինանսական դեմքն է, հիմա ինչպիսի՞ն է Հայաստանի տնտեսությունը. այնպես, ինչպես Հովիկ Աբրահամյանը:

Գիշեր-ցերեկ աշխատում է, վազում է երկրի մի ծայրից մյուսը, սակայն անօգուտ, ստիպված ենթականերին ցույց է տալիս, թե ով է երկրի վարչապետը, լեզուներ է սովորում, օրինակ՝ ռուսերեն, գյուղացիներին ցույց է տալիս, որ մտահոգ է, սակայն սեփական 100 հա բոստանն է ջրում, ինքը թանկարժեք մեքենաների չսահմանագծված ավտոպարկ ունի, սակայն Արարատի մարզի բնակչությունը զմիմյանս փաթաթված է գնում-գալիս:

Հիմա Հայաստանի տնտեսությունը. գիշեր-ցերեկ տնտեսությունն աշխատում է, սակայն անօգուտ, գյուղացիներն ամեն օր փորձում են ջրել իրենց բանջարանոցները, սակայն դա ոչ բոլորին, և ոչ ամենուր է ստացվում, մարդիկ, եթե կարողանում են, մեկ հնամաշ մեքենա են ձեռք բերում ու ձեռքն ընկնում կրակը վերանորոգող վարպետների մոտ, ինչ ցանում են՝ կա′մ չի կանաչում, կա′մ էլ բերքը մնում է գյուղացու ամբարում, լավագույն դեպքում մթերում են ու փողն այդպես էլ չեն տալիս:

Այսպես՝ հիմա ՀՀ վարչապետը Հայաստանի դե՞մքն է, թե՞ոչ: Ոչ ոք չի կարող ասել՝ նա տնտեսության դե՞մքն է, թե՞ ոչ, քանի որ երբեք հայելու մեջ չի նայում՝ վախենում է թե′ նմանությունից, թե′ տարբերությունից:

Գուցե պատմաբանները, վերլուծելով երկրի պատմությունը, ստույգ ասեն, չի բացառվում, որ խարդախեն. եթե ասեն՝ նման են, կարող են…, եթե ասեն տարբեր են, ապա…:

Ասում են՝ Հովիկ Աբրահամյանի հենասյունը Սերգո Կարապետյանն է, մեկ շիշ կոնյակ վերցրել-գնացել է գյուղնախի ծնունդը շնորհավորելու: Իրոք արժե, քանի որ ոլորտում զբաղված լինելով բնակչության շուրջ 500 000 մարդ, այսօր ոլորտում տրագիկոմեդիա է և սոված գյուղբնակչության նվագախումբը ղեկավարում է Սերգո Կարապետյանը, ով սևը սպիտակ է ցույց տալիս՝ այսպիսով օգնելով վարչապետին տնտեսական զարգացման ցուցանիշներ ապահովել: Այնպես որ՝ արժեր զոհել մեկ շիշ կոնյակ և գնալ Սերգո Կարապետյանին շնորհավորելու:

Ասում են՝ առաջիկա ՏԻՄ ընտրություններում, եթե տապալվի ՀՀԿ-ն, ապա կբացվի հետնամուտքի դուռը, իսկ դռան հետևում նախկին փոխվարչապետ Արմեն Գևորգյանն է:

Newspress.am