«Ժողովուրդ». Գագիկ Ծառուկյանի մտերիմը որդուն նշանակել է իր նախկին պաշտոնին
«Ժողովուրդը» գրում է.
««Ոսկի զավակներին» տեղավորելու երևույթը թափանցել է Հայաստանի բոլոր ոլորտներ: Արդյունքում պաշտոնները սկսել են նաև «ժառանգել»: Երևանի օլիմպիական հերթափոխի պետական մարզական քոլեջի տնօրենի պաշտոնն արդեն մի քանի տարի է՝ զբաղեցնում է Արմեն Գաբրիելյանը, որը ՀԱՕԿ փոխնախագահ Դերենիկ Գաբրիելյանի որդին է: Գաբրիելյան կրտսերն իր ներկայիս պաշտոնում փաստացի փոխարինել է իր հորը:
«Ժողովուրդ»-ը Դերենիկ Գաբրիելյանից փորձեց պարզել, թե ինչպես է ստացվել, որ հենց իր որդին է իր նախկին պաշտոնում նշանակվել, և արդյոք դրան նպաստել են իր մտերիմ հարաբերությունները ՀԱՕԿ նախագահ Գագիկ Ծառուկյանի հետ: «Ինքը (Արմեն Գաբրիելյանը,- խմբ.) սկզբից աշխատել է բանվոր, բռնցքամարտով է պարապել, բարձր արդյունքների չհասավ և որոշեց զբաղվել մանկավարժությամբ: Ինչպես օրենքն է պահանջել, մասնակցել է մրցույթի, անցել է համապատասխան կուրսեր, հանձնել է քննություններ և շահել: Իհարկե, չի նպաստել (Գագիկ Ծառուկյանը,- խմբ.): Ես այնպիսի ճանապարհ եմ անցել, եթե իմ զավակը լինի ոչ արժանի այս պաշտոնին, և ես զգայի, որ նա իր պարտականությունները ճիշտ չի կատարում, առաջինը ես դեմ կքվեարկեի»,- ասաց Դերենիկ Գաբրիելյանը: Հենց խնդիրն էլ այդ է, որ Հայաստանում «ամենաարժանները» պաշտոնյաների զավակներն են, դա է պատճառը, որ հայ երիտասարդներն օտար երկրներում են իրենց տեղն ու դերը փնտրում»:
Մանրամասները՝ թերթի այսօրվա համարում:
