Հայ-հայ, հասե՛ք, նարկոտիկ ներկրողի են ձերբակալել

Անհատ ձեռնարկատեր Ն. Թ.-ն Ռուսաստանի Դաշնությունից ձեռք է բերել և 25.07.16թ. ՀՀ պետական սահմանով սահմանված կանոնների խախտմամբ, առանց համապատասխան լիցենզիայի առկայության, մաքսանենգ ճանապարհով ներմուծել է ներկերի արտադրության մեջ օգտագործվող շուրջ 5 տոննա քաշով «Տոլուոլ» տեսակի հոգեներգործուն նյութ:

ՀՔԾ-ի ստուգումների արդյունքում պարզվել է, որ հիշյալ հոգեներգործուն նյութերը ներմուծելիս փաստաթղթերը ներկայացվել են ՀՀ ԿԱ ՊԵԿ մաքսային ծառայության Բագրատաշենի բաժանմունքի ծառայողներին, որից հետո վերջիններիս կողմից թույլատրվել է բեռի բացթողումը: «Տոլուոլ» տեսակի հոգեներգործուն նյութը ՀՀ պետական սահմանով սահմանված կանոնների խախտմամբ տեղափոխելու և ՀՀ ԿԱ ՊԵԿ մաքսային ծառայողների կողմից իրենց պարտականության նկատմամբ անփույթ վերաբերմունք դրսևորելու դեպքերի առթիվ ՀՀ քրեական օրենսգրքի 267.1-րդ հոդվածի 4-րդ մասի 1-ին կետի և 315-րդ հոդվածի 1-ին մասի հատկանիշներով հարուցված քրեական գործը ընդունվել է ՀՀ հատուկ քննչական ծառայության վարույթ:

Հիշեցնենք, որ «Տոլուոլն» արոմատիկ ածխաջրածին, անգույն, օդում այրվող հեղուկ է, օրգանական լուծիչ։ «Տոլուոլի» գոլորշիներ պարունակող օդը պայթուցիկ է։ Տոլուոլն անջատում են բենզինների կատալիտիկ ռիֆորմինգի վերջնանյութերից՝ ընտրողական լուծահանման և բազմաթորման միջոցով։ Օգտագործվում է բենզոլի, բենզոյական թթվի, նիտրատոլուոլի, բենզիլքլորիդների, ներկանյութերի և այլ նյութերի արտադրության համար, նաև որպես պոլիմերների լուծիչ։ Թույլ նարկոտիկ է։

Իսկ թե ինչպես է 5 «Տոլուոլն» հայտնվել Հայաստանում՝ անցնելով մաքսակետը, որտեղից օձն իր պորտով և ղուշն իր թևով չի անցնում, սակայն նարկոտիկն անցել է: Չի բացառվում, որ ներկրող Ն. Թ.-ն «ինչ-որ մարդկանց» հետ ինչ-որ բան «չի կիսել», որ նախ թույլատրել են թույլ նարկոտիկի անցումը, իսկ հետո վարույթ հարուցել:

Ո՞վ պետք է ներմուծումից հետո գա, ստուգի մաքսակետի աշխատակիցների յուրաքանչյուր քայլը կետ առ կետ, իհարկե, ոչ ոք, առանձնապես, եթե շահագրգռված չէ: Չեն ալարել, գնացել են ու գտել թույլ նարկոտիկ ներկրողին, ինչն էլ նշանակում է, որ հրաշալի իմացել են ներկրման մասին, սակայն, ինչպես ասում են, վերջին պահին, ինչ-որ բան «չեն կիսել»:

Այստեղ, իհարկե, մենք գործ չունենք ինչ-որ կանոնների խախտման հետ, գործ ունենք «բազառի» հետ: Դե ասա, ա՛յ Ն.Թ., մարդկանց իրենց բաժինը տայիր, որ չգային գետնի տակից քեզ գտնեին: Թե չէ այսպես և′ քո բաժինը տարան, և′ իրենց բաժինը վերցրին, անունն էլ դրեցին հանցագործության բացահայտում: Դե հո մաքսայիններին չեն ձերբակալի «սխալի» համար. նրանք այս խաղի մեջ ընդամենը «պեշկաներ» են:

NewsPress.am