Ղարաբաղցիներին խաբելը դժվար է. ո՞ւր է գնում հոտած միսը

Տեղական շուկա ներմուծված հավի միսը վտանգավոր է մարդու առողջության համար: Oգոստոսի 29-ին կառավարության նիստում ԱՀ գյուղատնտեսության նախարարության սննդի անվտանգության պետական ծառայության պետ Լևոն Սարգսյանը նիստի մասնակիցներին է ներկայացրել ծառայության կողմից հավի մսի և ենթամթերքի շուկայում իրականացված դիտարկումների արդյունքները:

Լևոն Սարգսյանի խոսքով՝ վարչապետի հանձնարարականով կատարվել են համապատասխան նմուշառումներ ինչպես ՀՀ-ում և ԼՂՀ-ում արտադրվող ապրանքատեսակների, այնպես էլ այլ պետություններից ներմուծված մթերքների մասով, որոնք ենթարկվել են լաբորատոր փորձաքննության:

«ԼՂՀ-ում սահմանված նորմաներին համապատասխանել են միայն ՀՀ-ում և ԼՂՀ-ում արտադրվող մթերքները, իսկ այլ պետություններից ԼՂՀ շուկա ներմուծված մթերքները ֆիզիկոքիմիական մասով նորմերին չեն համապատասխանել: Մասնավորապես, բացի համային, հոտային անորակ վիճակից, մթերքում առկա ֆիզիկոքիմիական հեղուկի, լուծույթի տոկոսայնությունը խախտված է մոտ երկու և ավելի անգամ: Այսպիսով, Սննդամթերքի անվտանգության պետական ծառայությունը, հանդիսանալով ԼՂՀ-ում սննդամթերքի ոլորտում վերահսկող լիազոր մարմին, համադրելով ունեցած տվյալները, հիմք համարելով ԼՂՀ սննդամթերքի անվտանգության մասին օրենքի հոդված 2-ի 16 և 17-րդ կետերը, ծառայությունը բացի ՀՀ-ում և ԼՂՀ-ում արտադրված հավի մսի և ենթամթերքի, ԼՂՀ շուկայում իրացվող այլ հավի մսի և ենթամթերքի մասով չի հավաստում մարդու կյանքի կամ առողջության կամ ապագա սերունդների կյանքի և առողջության վրա վնասական ներգործության հետ կապված անընդունելի ռիսկի բացակայությունը»,- ներկայացրել է Լ. Սարգսյանը և հավելել, որ նման դիտարկումները կշարունակվեն նաև ռիսկային խմբին պատկանող այլ ապրանքատեսակների մասով:

Իր մտահոգությունը հայտնելով առկա խնդրի առնչությամբ՝ վարչապետ Արայիկ Հարությունյանը հանձնարարել է ոլորտի պատասխանատուներին էլ ավելի ուժեղացնել վերահսկողությունը սննդի անվտանգության ապահովման ուղղությամբ և, պարբերական ստուգումներին զուգահեռ, բացատրական աշխատանքներ իրականացնել բնակչության շրջանում:

«Մենք ահազանգներ ենք ստացել ՀՀ և ԱՀ տարածքից դուրս արտադրվող հավի մսի որակի և գնի դեմփինգի վերաբերյալ, այդ պատճառով հանձնարարել եմ ուսումնասիրել ոլորտը: Այժմ պարզվում է, որ նշյալ ծագման մսի մեջ լուծութային հավելումներ են սրսկվում, որը խնդիրներ է ստեղծում որակի առումով, ինչպես նաև արհեստականորեն ավելացնում է մսի կշիռը՝ էժան գնով խաբելով գնորդներին: Հանձնարարում եմ խիստ վերահսկողություն իրականացնել այս բնագավառում, որպեսզի խուսափենք ապօրինի և բնակչության առողջությունը վտանգող գործողություններից»,- ասել է Արայիկ Հարությունյանը:

Սա օգոստոսի 29-ին, որին հաջորդեց թռչնաբույծների միության նախագահ Սերգեյ Ստեփանյանի դիտարկումը, ըստ որի, «Առավել վտանգավոր է հատկապես Թուրքիայից ներկրվող «փրթված» թռչնամիսը, որը հիմնականում օգտագործում են արագ սննդի մեջ»: Իսկ Հայաստանի ՍԱՊԾ-ն անմիջապես պարզաբանեց, որ Հայաստանի Հանրապետության տարածք ներմուծվող թռչնամսի գերակշիռ մասը ենթարկվում է լաբորատոր փորձաքննության, որի արդյունքների հիման վրա էլ թույլատրվում է ներմուծումը: Գերակշիռ մասը, այսինքն` ոչ ամբողջությամբ:

Այն, որ սառեցված մսի ոչ բոլոր խմբաքանակներն են սահմանին ստուգվում, պարզել է hetq.am-ի հետազոտությունը  Եվ այժմ ասել, որ գերակշիռ մասը ստուգվում է՝….:

ԼՂՀ ՍԱՊԾ-ն, երևի թե իր մաշկի վրա զգալով Հայաստանից եկող ճնշումները, երեկ հաղորդագրություն տարածեց, որտեղ ասվում է. «Օգոստոսի 29-ին ԼՂՀ կառավարության նիստում ՍԱՊԾ պետն իր զեկույցում ներկայացրել է փաստեր, որ այլ պետություններից ներմուծված հավի միսը և ենթամթերքը մարդու կյանքի առողջության համար միանշանակ վտանգավոր են:

Սննդամթերքի անվտանգության պետական ծառայության պետը պարզաբանել է ԼՂՀ կառավարության նիստի իր զեկույցի բովանդակությունը, որպեսզի որոշ անձինք և ԶԼՄ-ների ներկայացուցիչներ չփորձեն հարցը ոչ ճիշտ շահարկել: Իրականացնելով դիտարկումներ` ծառայությունը ֆիզիկոքիմիական ցուցանիշներով խախտումներ է հայտնաբերել:

Այլ պետություններից ԼՂՀ իրացման շուկայում առկա բոլոր տեսակի հավի մսի և ենթամթերքի մասով, մանրէաբանական ցուցանիշները եղել են համապատասխան նորմաներին, որոնք թույլ են տալիս չարգելել այդ մթերքների իրացումը, բայց, հաշվի առնելով հաճախակի խախտումները, ծառայությունը չի բացառել վտանգավորությունը բացակայությունը ըստ ԼՂՀ սննդամթերքի անվտանգության մասին օրենքի հոդված 2-ի 16-րդ և 17-րդ կետերի:

ԼՂՀ ՍԱՊԾ-ն մշտական գործընկերային կապի մեջ է ՀՀ ՍԱՊ ծառայության հետ, և որևէ կասկած չպետք է ունենալ, որ ՀՀ ՍԱՊԾ կողմից լաբորատոր փորձաքննությունների ՀՀ ներմուծման ընթացքում չեն իրացվելու վերոնշված տեսակի միսը և ենթամթերքները: Անկախ նրանից, որ ՀՀ սահմանով ներմուծման ժամանակ նշված միսը և ենթամթերքը ենթարկվում են փորձաքննության, այնուամենայնիվ տնտեսավարողի կողմից հետագա պահպանման, տեղափոխման, վերավաճառման և վերատեղափոխման ժամանակ կարող են առկա լինել բազմաթիվ բարձր ռիսկեր, որոնք էլ, չւ բացառվում, որ մթերքը կարող է դառնալ վտանգավոր:

Աղբյուրի հաղորդմամբ` հաշվի առնելով վերը նշված հանգամանքները` ծառայությունը նշված մթերքի մասով, բացի ՀՀ-ում և ԼՂՀ-ում արտադրված մթերքների, առանց նախնական փորձաքննությունների, ԼՂՀ-ում չի թույլատրելու մթերքի վաճառքը, եթե բոլոր առումներով դրանք ստանդարտներին չհամապատասխանեն: Ծառայությունը որոշ անձանց նաև հորդորում է` զերծ մնալ ԼՂՀ ՍԱՊԾ դիրքորոշումը շահարկելուց. իրականացնելու ենք վերահսկողություն ռիսկային խմբին պատկանող ապրանքների իրացումը թույլատրելու սահմաններում»:

Ծառայության աշխատողները վստահ են, որ ռիսկային ապրանքների անվտանգության հարցերում, ուղղակի վտանգավորության ռիսկի առկայության պարագայում անգամ, ԼՂՀ-ում պարտավոր են իրականացնելու համապատասխան վերահսկողություն` հաշվի առնելով նաև այլ տեսակի չբացառված անվտանգության ռիսկեր ևս: Մի բան հստակ է, որ ղարաբաղցիներին խաբելը դժվար է, պետք չէ անորակ միսը որակյալ մսի տեղ հասցնել Արցախ. միևնույն է՝ ստուգելու են, ոչ թե հավատան ինչ-որ կասկածելի թղթաբանության և անհոդաբաշխ պաշտոնական հավաստիացումների:

NewsPress.am