Մարտի 1-ը բացահայտման առումով իմ առաջնահերթություններից է լինելու. Արթուր Դավթյան

Գլխավոր դատախազի թեկնածու Արթուր Դավթյանն այսօր ներկայանում է Ազգային ժողովին: Դավթյանին հարց ուղղեց ԱԺ ԲՀԿ խմբակցության Միքայել Մելքումյանը ՝ որոնք են լինելու նոր դատախազի անելիքները, այն պարագայում, երբ երկրում բացակայում է արդարությունը:

Արթուր Դավթյանը խոստովանեց՝ որպես Հայաստանի Հանրապետության քաղաքացի՝ նման խնդիրներ տեսնում է: «Առօրյա գործունեության հրապարակայնությամբ եմ տեսնում խնդրի լուծումը»,- ասաց Դավթյանը՝ ավելացնելով, որ խնդիրը պետք է լուծել նաև բարձր որակավորման կադրեր ներգրավելով:

ՀԱԿ խմբակցության պատգամավոր Արամ Մանուկյանն իր հերթին ասաց, որ աղմկոտ գործերի չբացահայտումը, ինչպիսիք են Հոկտեմբերի 27-ը, Մարտի 1-ը, ստեղծում է մի մթնոլորտ, որն սպանում է քաղաքացու հույսը։ Արամ Մանուկյանը հարց ուղղեց գլխավոր դատախազի թեկնածուին, թե ո՞րն է լինելու նրա մոտեցումը «ոչ սովորական գործի առնչությամբ»:

«Իմոտեցումը համընդհանուր ճշմարտությունն է, որ չբացահայտվող հանցագործություններ չպետք է լինեն: Նախորդ գլխավոր դատախազը որոշակի դատավարական մեխանիզմներ իրականացրեց, որոնք արդյունավետություն պետք է ապահովեին, հիմա էլ քրեական գործի վարույթը կասեցված չէ»:

Դավթյանը նշեց, որ իրեն ևս հուզում է քրեական գործը և ընտրվելու պարագայում ինքը մանրամասն կուսումնասիրի այն:

«Մարտի 1-ը բացահայտման առումով իմ առաջնահերթություններից մեկն է լինելու, այլ երաշխիքներ չեմ կարող ներկայացնել, քանի որ քրեական գործի նյութերի հետ առիթ չեմ ունեցել շփվելու»,- ասաց գլխավոր դատախազի թեկնածուն:

Ընդդիմադիր պատգամավորն առաջարկեց Ազգային ժողովի առաջ խոստանալ հինգ ամիսը մեկ ներկայացնել, թե Մարտի 1-ի գործով իրավական ինչպիսի գործողություններ են կատարվել: Դավթյանն ի պատասխան կրկնեց՝ Մարտի մեկի գործն իր առաջնահերթություններից է: