Հովիկ Աբրահամյանի 241 մլն դրամն այլևս ոչինչ է

«Ժամանակ»-ի տեղեկություններով՝ նորանշանակ վարչապետ Կարեն Կարապետյանն ընդամենը մի քանի օր վարչապետի լիազորություններն ստանձնելուց հետո, հայտարարել է, որ զզվում է նախկին վարչապետ Հովիկ Աբրահամյանի կողմից կառուցված միլիոնավոր դրամների հասնող ոսկեզօծ սենյակներից ու դահլիճներից և հրահանգել է նվազագույն ծախսերով դահլիճները բերել նախնական տեսքի՝ խորհրդային ժամանակներում կառուցված մինիմալիստական լուծումներով հարդարանքով:

Այս իրավիճակում բացասականն այն է, որ յուրաքանչյուրը կարող է գալ կառավարություն, Ազգային ժողով, այն վերափոխել՝ ըստ իր ճաշակի և ցանկությունների, և պետական մոտեցում բոլորովին չկա, թե ինչպես է լինում գերատեսչական կամ պետական այս կամ այն շինության ներքին և արտաքին հարդարումը:

Չի բացառվում, որ վաղն էլ միլիոններ ծախսվեն, ու գերատեսչությունները փոխվեն՝ ժամանակավոր պաշտոնյայի ցանկություններին համահունչ:

Իհարկե, Հայաստանի բյուջեն էժան կպրծնի, եթե նորանշանակ վարչապետ Կարեն Կարապետյանը մինիմալիստական տեսքի բերի կառավարությունը, այլ չորոշի վերանորոգել:

Հիշեցնենք, որ 2014թ. դեկտեմբերի 11-ին կառավարության աշխատակազմը «ՎԵԿՍ» ՍՊԸ-ի հետ կնքել է պետության կարիքների համար կապալային աշխատանքների կատարման պետական գնման պայմանագիր՝ 214 մլն դրամ ընդհանուր արժեքով: Այդ գնից 73.762.000 դրամը փոխանցվել է շինարարական ընկերության հաշվին՝ որպես կանխավճար: Հավելենք, որ «ՎԵԿՍ» ՍՊԸ-ն է վերանորոգել նաև ԱԺ նիստերի դահլիճը:

Փոխվել են կառավարության դահլիճների կահույքի մի մասը, դռները, վերանորոգվել ու ոսկեզօծվել են պատերը: Բուխարու դահլիճի միայն երկու երկփեղկանի հաճարի փայտով ու քանդակներով դռներն արժեցել են մոտ 2.5 մլն դրամ՝ 1քմ 326.000 դրամ, իսկ ոսկեզօծ շքամուտքով և քանդակներով 2 դռների շրջանակներն արժեցել են 1.620.000 դրամ, հատը՝ 810.000 դրամ: Դահլիճի 58 քմ տարածքում՝ 1քմ 273.000 դրամով, կատարվել է պատերի երեսպատում: Այս աշխատանքը պետբյուջեի վրա արժեցել է 15.834.000 դրամ:

«ՎԵԿՍ» ՍՊԸ-ն պատկանում է Տարածքային կառավարման և զարգացման առաջին փոխնախարար Վաչե Տերտերյանի փեսային՝ Կարեն Սարգսյանին:

2015թ. մարտի 2-ին կառավարության աշխատակազմի և «ՎԵԿՍ» ՍՊԸ-ի միջև կնքվել է նոր պայմանագիր, որի գինը կազմել է 27 մլն 454 հազար դրամ: Ընդհանուր առմամբ, կառավարության ոսկեզօծ հարդարանքի վրա ծախսվել էր 241 մլն դրամ և իզո՞ւր:

varchapet-ashxatasenyak varchapet-ashxatasenyak1 varchapet-ashxatasenyak2 varchapeti-ashxatasenyak

NEWSPRESS.am