«Հրապարակ». Ընտրություններ և պաշտոնանկություններ Լոռիում
«Հրապարակ» թերթը գրում է.
«Օրերս աշխատանքից ազատվել է «Գազպրոմ Արմենիա» ընկերության Լոռու մարզի Թումանյանի տարածաշրջանի տարածքային կառույցի ղեկավար Սարգիս Այվազյանը։ Մենք գրել էինք, որ նա ակտիվորեն ներգրավված է Օձունի ղեկավարի ընտրություններում և մտադիր է իր եղբորորդուն դարձնել գյուղապետ։ Նրա դեմ պայքարում է իր երբեմնի ենթական՝ Օձունի «գազի գրասենյակի» նախկին ղեկավար Արարատ Դավթյանը։ Վերջինս նախընտրական շրջանում ազատման դիմում գրեց։ Ասում են՝ այս հողի վրա լարվել են Այվազյանի և Դավթյանի հարաբերությունները։
Մի քանի օր առաջ, սակայն, Ս. Այվազյանը ևս ազատվել է աշխատանքից։ «Գազպրոմ Արմենիայից» հաստատեցին այս տեղեկությունը՝ նշելով, որ Այվազյանն ազատվել է իր դիմումի համաձայն։ Պատճառները դեռ հայտնի չեն։ Սակայն մեզ ասացին, որ մարզում Սարգիս Այվազյանը հայտարարում է, որ չի ազատվել աշխատանքից, շարունակում է պաշտոնավարել։ Փորձեցինք այս լուրերը ճշտել նրանից։ Այվազյանն ասաց, որ չի կարող խոսել, դեպք է պատահել, խառն է հիմա. «Կհանդիպենք՝ կխոսենք, էլի, տեղս հարմար չէ, դեպք է պատահել։ Հորեղբորս թոռին մի սուտկա է՝ չեն գտնում, խառը վիճակ է»։ Մենք պարզեցինք, որ Այվազյանի հորեղբոր թոռը երիտասարդ տղա է, գնացել է անտառ՝ ընկույզ հավաքելու, և կորել է։ Հիմա փնտրում են, չեն գտնում։ ԱԻՆ-ից ռադիոլոկացիոն համակարգով փնտրել են, և հեռախոսը Դսեղի անտառներում է ցույց տվել։ Բայց ստույգ տեղը դեռ չեն գտնում։ Ասում են՝ կորածն առողջական խնդիրներ ուներ»։
Մանրամասները՝ թերթի այսօրվա համարում։
