Ինչո՞ւ է Մշակույթի նախարարությունը Մհեր Սեդրակյանին նախընտրում Ֆիլհարմոնիայից

2015 թվականից մինչ այսօր Հայաստանի պետական ֆիլհարմոնիային է հանձնարարվել կազմակերպել հուղարկավորության երկու արարողություն՝ Վահագն Հովնանյանի հուղարկավորությունը՝ տրված Սփյուռքի նախարարության 02.01.2015թ. հանձնարարականով և Սաբիր Ստեփանյանի հուղարկավորությունը՝ Էկոնոմիկայի նախախարության կողմից 13.04.2015թ. տրված հանձնարարականով:

NEWSPRESS.am-ի հարցին ի պատասխան՝ այս մասին ասաց Հայաստանի պետական ֆիլհարմոնիայի հանրային կապերի պատասխանատու Նելլի Ավետիսյանը՝ մեկնաբանելով տարածված այն տեղեկությունը, թե վերջին երկու տարվա ընթացքում պետական պատվերն իջեցվում է ոչ թե Ֆիլհարմոնիային, այլ ՀՀ ԱԺ պատգամավոր Մհեր Սեդրակյանին պատկանող «Ալեքս Մանչ» ՍՊԸ-ին:

Նելլի Ավետիսյանը նշեց, որ այս երկու տարվա ընթացքում Մշակույթի նախարարությունը Ֆիլհարմոնիային ոչ մի հանձնարարական չի տվել:

Նրա խոսքով՝ 1934 թվականից Հայաստանի պետական ֆիլհարմոնիան է կազմակերպել մշակույթի, պետական գործիչների հուղարկավորության արարողությունները: Ֆիլհարմոնիան կնքել է գնման պայմանագրեր, աշխատակիցները զբաղվել են կազմակերպչական բոլոր գործերով և հավուր պատշաճի կազմակերպել հուղարկավորության արարողությունը:

Նշեց նաև, որ 1936 թվականին, երբ Կոմիտասի աճյունը փոխադրվել է Երևան և թաղվել Կոմիտասի անվան պանթեոնում, այդ ամբողջ արարողակարգը նույնպես Ֆիլհարմոնիան է կազմակերպել:

Մեր այն հարցին, թե «Ալեքս Մանչ» ՍՊԸ-ի մասին ի՞նչ ինֆորմացիա ունի, ինչո՞ւ է Մշակությի նախարարությունը նախապատվությունը տալիս այդ կազմակերպությանը, վերջինս չկարողացավ պատասխանել: