Կարեն Կարապետյանն իշխանությունը չի բաժանում աղքատներին

Գաղտնիք չէ, որ Հայաստանի իշխանական օղակներում աղքատ մարդ դժվար գտնես, անգամ աշխատավարձով ապրող չինովնիկ դժվար է պեղել: Որոշ չինովնիկներ հարստանում են պաշտոնին համընթաց. ոմանք արագ, ոմանք էլ՝ ավելի արագ:

Կարեն Կարապետյանի նշանակվելուց հետո ենթադրվում էր, որ հարուստների հոսքը նվազ կլինի. պարզվեց, որ այդպես չէ: Նորանշանակ վարչապետի նորանշանակ գլխավոր խորհրդական Գագիկ Մարտիրոսյանն, ով արդեն ներկայացրել է իր ունեցվածքի մասին տվյալները, պարզվում է՝ աղքատ չէ:

Խորհրդականն ունի անհատական բնակելի 2 տուն: Գագիկ Մարտիրոսյանի դրամական միջոցները պաշտոնը ստանձնելու պահին կազմում են 17.5 մլն ռուսական ռուբլի՝ որպես աշխատավարձ և կենսաթոշակը՝ 63 հազար ռուբլի։

Կարծիք կար, որ հարուստները լինելով պաշտոնում՝ քիչ են «ուտում»: Գուցե այլ երկրներում այդպես է, սակայն Հայաստանում ուտելուց ավելի են ոգևորվում, ինչպես ֆրանսիացիներն են սիրում ասել՝ ախորժակը բացվում է ուտելիս:

Հին խոսք է, որ ազնիվ ձևով հնարավոր չէ հարստանալ. յուրաքանչյուր հարստության տակ գողություն, կողոպուտ, սպանություններ ու թալան կա: Իհարկե, կարելի է ազնիվ ձևով հարստանալ, սակայն նման ազնիվ հարուստի հանրությունը փնտրում է, ու կարծես հայտնաբերումներ չեն եղել:

Էլ ո՞ւմ է պետք, ջահել, սիրուն, խելացի, սակայն աղքատ: Պետք է ջահել, սիրուն, խելացի միայն փողով:

Այսինքն՝ փող ունենալ, նշանակում է՝ լինել ջահել սիրուն, խելացի, իսկ փողի աղբյուրներն արդեն էական չեն:

Ենթադրվում էր, որ նոր վարչապետը չի ընկնի հարուստների ճանկը, սակայն, ինչպես երևում է՝ Կարեն Կարապետյանը գնում է նախկինների ուղիով. պաշտոններում նշանակում է միայն կա′մ «Գազպրոմ Արմենիայի» աշխատակիցների, կա′մ ռուսահպատակ հարուստների, կա′մ պարզապես հարուստների:

Կարո՞ղ են արդյոք հարուստները հեղափոխություն անել համակարգում: Համաշխարհային պատմությունը ցույց է տալիս, որ ոչ: Ինչպես երևում է՝ Կարեն Կարապետյանը Հայաստանում համակարգային փոփոխություններ չի անելու, հանրությունը դեռևս գնահատում է նորանշանակ վարչապետի արտաքին տվյալները և միայն:

NEWSPRESS.am