ՏԻՄ ընտրությունների պառաված հմայքը

Ավարտվեցին տեղական ինքնակառավարման մարմինների ընտրությունները: Ամբողջացնելով ընտրությունների արդյունքները՝ նշենք, որ ընտրված համայնքապետերի, ավագանու անդամների մոտ 60 տոկոսը ՀՀԿ անդամներ են:

Թվում էր, թե այս անգամ ընտրությունների արդյունքներն այլ կերպ կլինեն, քանի որ ՀՀԿ իշխանության տարիներին մարդիկ հիշեցին փայտ վառելու «արվեստը», արտագաղթը խորացավ, սոցիալական արդարություն ասվածն ուղղակի թղթաբանություն է, աղքատությունը տարբեր հաշվարկներով տատանվում է 35 տոկոսից մինչև 70 տոկոսի սահմաններում:

Կարճ ասած՝ նման պայմաններում ապրողները հաստատ ՀՀԿ անունը լսել չէին ցանկանա:

Մեր դիտարկումներով՝ ընդդիմացողների մի մասն ընտրել էր պասիվ ընդդիմությունը՝ ընտրության չէր գնացել, մի մասը քվեաթերթիկներ էր մրոտել տարբեր գրառումներով:

Պատվավոր տեղ էր զբաղեցնում ընտրակաշառքը կամ դրամային, կամ էլ «սեղան գցելու» տեսքով: Այս վերջինը նորույթ է, որպեսզի շատ փող չծախսեն կամ էլ ընտակաշառք ասվելուց խուսափեն, թեկնածուն իր շքախմբով անցնում է տնետուն, իր հաշվին սեղան գցում, հորդորում իրեն ընտրել:

Մի մասն էլ ընտրել է բարեկամ-ազգականների խնդրանքով, «դե մեր ախպերն ա, որ ընտրվեց՝ մեզ թև ու թիկունք ա լինելու»: Այս պարագայում ՀՀԿ ես, թե մեկ այլ կուսակցության ներկայացուցիչ, էական չէ, կարևորը «ախպերությունն» է:

Ինչո՞ւ ՏԻՄ ընտրություններն այդպես էլ արդյունավետ չեն լինում, քանի որ թեկնածուները ծրագրեր չունեն՝ գյուղի, քաղաքի զարգացման համար, պարզապես մտածում են՝ գնան փող աշխատեն, ուրիշ ոչինչ:

Նաև այդ պատճառով է, որ համայնքները չեն զարգանում. ղեկավարը ո′չ ծրագիր ունի, ո′չ էլ մտահոգություն համայնքի զարգացման համար, միայն փող: Նա անգամ չի կարող համայնքի ներկայացուցիչների շահերը պաշտպանել, քանի որ պետական շահը պաշտպանել չի կարող, էլ չենք խոսում կուսակցության աչքից ընկնելու մասին:

Իսկ եթե պետական և կուսակցական շահերն է պաշտպանելու, ապա համայնքի շահը տուժելու է:

Նկատենք, որ անկախությունից հետո միշտ էլ այդպես է եղել՝ հիմնականում վեր են եղել կուսակցության շահերը, իսկ համայնքների համաչափ զարգացում և նման մոլորեցնող արտահայտությունները պարզապես քարոզչություն են:

Այնպես որ՝ ՏԻՄ ընտրությունների չկայանալը համակարգային է, ոչ թե լոկալ բնույթ է կրում: Նման ընտրություններով համայնքը չի զարգանա, ինչպես չի զարգացել և չի զարգանում:

NEWSPRESS.am