Լիբանանում հաստատված սիրիահայ երեխաները կրթության հետ կապված դժվարություններ ունեն

Սիրիական հակամարտության ընթացքում բազմաթիվ հայ ընտանիքներ տեղափոխվեցին Լիբանան, և այսօր Լիբանանում լիբանանահայ համայնքում առաջացել է սիրիահայ փոքրիկ համայնք՝ իր խնդիրներով:

Լիբանանում այս պահին գտնվում է մոտ 15-16 հազար սիրիահայ: Նրանց աջակցում է լիբանանահայ համայնքը, նրանք բնակվում են կա′մ վարձակալությամբ, կա′մ հարազատների մոտ:

Ինչպես NEWSPRESS.am-ին փոխանցեց գեղանկարիչ, հասարակական գործիչ Ճորճ Ամպարճեանը, սիրիահայ երեխաների համար կրթավճարների խնդիր կա, քանի որ վճարները բարձր են, և նրա միակ մտահոգությունն է, որ հայ աշակերտները չզրկվեն հայկական վարժարաններում սովորելու հնարավորությունից:

Ըստ նրա` մոտ 60 աշակերտ այսօր դժվարանում է ուսման վարձավճարները մուծել, և նրանց կրթության հարցը խնդրահարույց է:

«Հայկական վարժարաններում մեկ երեխայի կրթավճարը 2000-2500 դոլար է: Սիրիահայ երեխաներին զեղչեր տրամադրվում են, սակայն շատ քիչ, համալսարաններում ևս նման խնդիր կա»,- ասաց նա՝ հավելելով, որ Լիբանանը Մայր գաղութ է, և սիրիահայ երեխաների կրթության համար հնարավոր է գումարներ հայթայթել, որպեսզի նրանց հայեցի կրթությունը գումարների բացակայության պատճառով չընդհատվի:

«Ուսումը թող սիրիահայ գաղթականների համար լույս լինի, որպեսզի կյանքի դժվարությունները հաթահարեն»,- շեշտեց Ճորճ Ամպարճեանը: Նա նաև նշեց, որ կան սիրիահայ երեխաներ, ովքեր ստիպված են խանութներում աշխատել և կրթություն չեն ստանում՝ գումարներ չունենալու պատճառով:

Նա դիտարկում է սիրիահայ երեխաների կրթության երկու կողմ. կա′մ միջոցներ գտնել վարձավճարների համար, կա′մ սիրիահայ երեխաներն անվճար կրթություն ստանան:

Լիբանանում կրթաշրջանը մեկնարկել է հոկտեմբերի 6-ից:

NEWSPRESS.am