Կարեն Կարապետյանը՝ ՀՀԿ անկողնում

Լուրեր են պտտվում, որ վարչապետ Կարեն Կարապետյանը համալրելու է ՀՀԿ-ի շարքերը: Հանրությունը կարծես թե դրական ակնկալիքներ ունի նորանշանակ վարչապետից. մարդկանց դրական է տրամադրում բարեկիրթ պահվածքը, պրագմատիկ գործելաոճը, նաև, ինչո՞ւ չէ, արտաքին տվյալները:

Սակայն եթե Կարեն Կարապետյանը որոշել է մտնել ՀՀԿ-ի շարքերը, այն դրական աուրան, որը ստեղծվել է վարչապետի շուրջ, կփլուզվի:

ՀՀԿ-ն կարծես թե հատուկ կուրս է ստանձնել փչացնելու յուրաքանչյուր անձի, ով քիչ թե շատ վայելում է հանրության վստահությունը, ու կարծես թե, դա ՀՀԿ-ին հաջողվում է:

Հիշենք, թե քանի-քանիսն էին՝ անմեղ-անմեղ մտան կառավարություն կամ քաղաքականություն, և մինչև լույսը կբացվեր, հայտնվեցին ՀՀԿ անկողնում: Հերթը Կարեն Կարապետյանինն է:

Մարդ Աստծո, երևի թե պետք չէր այսքան շուտ, պետք էր սպասեր մինչև ամեն ինչ ընթանար բնականոն. Ժողովուրդն սկսկեր կասկածել վարչապետին, հետո վերջնական տապալումից հետո կախվեր փրփուրներից՝ մտներ ՀՀԿ: 

Սակայն նորանշանակ վարչապետն «ամեն ինչ՝ միանգամից»-ի կողմնակիցն է:

Եթե վարչապետն իրոք դառնա կարկառուն ՀՀԿ-ական, ապա մեր երկրում ոչինչ չի փոխվի, չի լինի մեկ քաղաքական գործիչ, ով կվայելի հանրության վստահությունը, մի՞թե այդքանը Կարեն Կարապետյանը չի հասկանում:

Այստեղ խնդիրը ոչ թե ՀՀԿ-ն է, այլ այն, որ այս կուսակցությունը սեփականաշնորհել է ՀՀ քաղաքական կյանքը և երկրի հետ վարվում է սեփական մառանի նման, որտեղ սնունդ կա, սակայն կան նաև ամեն տեսակ մլակներ և կրծողներ, իսկ թթվածին՝ ոչ:

Արդյոք դրա՞ համար է իր ծանր տեղը Կարապետյանը թեթևացրել, կարող էր պարզապես հանրությանը չմոլորեցնել ազնիվ, հեղափոխական, պայքարող կերպարով, այլ ազնվորեն խոստովաներ, որ շարքային ՀՀԿ-ական է:

NEWSPRESS.am