Ձեր համարձակությունը չի հերիքում՝ ասելու այսօրվա իրական վիճակը. պատգամավորը՝ նախարարին

Ոգևորված եմ Ձեր համարձակությունից, որ համաձայնել եք դառնալ այս նախարարության ղեկավարը: Այդ մասին այսօր Ազգային ժողովում 2017 թվականի բյուջեի նախագծի քննարկման ժամանակ, դիմելով Տնտեսական զարգացումների և ներդրումների նախարար Սուրեն Կարայանին՝ ասաց ԱԺ ՀԱԿ խմբակցության պատգամավոր Արամ Մանուկյանը:

«Դուք նախարար եք մի բանի, որը չկա՝ ո′չ զարգացում կա, ո′չ ներդրում»,-  ասաց Մանուկյանը:

Պատգամավորը նշեց, որ վերջին մի քանի տարվա ընթացքում ՀՆԱ-ի նկատմամբ մեր ներդրումները 40 տոկոսից իջել են 20 տոկոս. «Կարո՞ղ եք ասել՝ ինչո՞ւ: Կարո՞ղ եք վերլուծության արդյունքը խորհրդարանին ներկայացնել՝ ինչո՞ւ է 2 անգամ մեր ներդրումների մակարդակը կտրուկ իջել, տարիներ շարունակ միայն իջնում է»,- ասաց Մանուկյանը:

Մանուկյանը նշեց, որ եթե Կարայանը չի համարձակվում այսօրվա դրությունը գնահատել իբրև ճգնաժամային, եթե չի ուզում տալ ճշգրտիտ «դիագնոզ», ապա նրա ռեցեպտներն ու բուժիչ դեղերը համոզիչ չեն. «Ձեր ասածը համոզիչ չէ, Դուք պիտի այսօրվա գնահատականն ասեք, դա դառնա բազա, ելման կետ, որից գնանք առաջ, Ձեր համարձակությունը չի հերիքում՝ ասելու այսօրվա իրական վիճակը»:

Պատգամավորի խոսքով՝ այսօրվա իրական վիճակը պետք է համեմատել նաև հարևան երկրների հետ: Եթե համեմատում ես, տեսնում ես, որ ընդհանրապես մրցունակ չես: Չունես որևէ միջազգային պրոյեկտ, որի համար վաղը գրավիչ ես լինելու, գումար է գալու:

«Եթե Հայաստանում հայաստանցիների գումարը՝ և՛ բիզնեսը, և՛ կանխիկ գումարը, պաշտպանված չէ և դուրս է հոսում, ապա ինչո՞ւ ուրիշը պետք է դրսից գումար բերի ներս, քանի որ ներսում քո բիզնեսն ապահովագրված չէ»,- հարցրեց Մանուկյանը:

Համեմատելով հարևան երկրների հետ՝ պատգամավորն ասաց, որ միայն Թուրքիան միայն Ադրբեջանում, միայն Վրաստանում, ավելի շատ ներդրումներ է անում, քան բոլորը միասին Հայաստանում:

«Միայն Իրանն Ադրբեջանում ունի այնքան պրոյեկտնոր, այնքան գումար է ներդնում, որ ամբողջ աշխարհը միասին Հայաստանում այդքան չի ներդնում: Դա այն Իրանն է, որ Հայաստանի ռազմավարական հարևանն է: Միայն Վրաստանը Մետաքսի ճանապարհի համար բերում է պրոյեկտ՝ 42 միլիարդ դոլարի, դո՞ւք ինչ եք արել: Այս ամբողջ ընթացքում մի հատ Մետաքսի ճանապարհ չլսեցի, միջազգային պրոյեկտ էր, որը Հայաստանով էր գնում, ի՞նչ արիք»,- հարցրեց Մանուկյանը:

Շարունակելով համեմատությունը հարևան երկրների հետ՝ Արամ Մանուկյանը կրկին դիտարկեց Վրաստանի օրինակն ու ասաց, որ այդ երկիրն այս տարի 6 միլիոն տուրիստ է բերել. «Ամեն տուրիստ ռեկլամ ա, ներդրումների միջոց: Հայաստանի մշակո՞ւյթն ա թույլ, քիչ, ոչ արժեքավոր, որ Վրաստանից այսքան հետ ենք: Որտե՞ղ է Ձեր պրոյեկտը, ռազմավարությունը, ասելիքը, որ ասում եք՝ գրավիչ է լինելու, որ մարդը գա այստեղ, պաշտպանված լինի, գումար դնի: Մեր բիզներսը փախնում ա Վրաստան, Ռուսաստան, գումարները փախնում են, 1,5 միլիարդ փախնում ա դուրս, ասեք՝ էս ճգնաժամի դեմը կանգնեցնենք, հետո զարգացման ծրագիր ներկայացնենք: Ասեք՝ որո՞նք են լինելու կոնկրետ քայլերը, որ Ձեր ասածները դառնալու  են իրականություն»,- վերջնական ձևակերպելով հարցը՝ ասաց Մանուկյանը:

Պատասխանելով պատգամավորին՝ նախարար Կարայանն ասաց՝ այո, պետք է տալ ճիշտ դիագնոստիկա: «Ներկայումս մենք այդ գործընթացի մեջ ենք: Դրանից հետո մենք պետք է վերհանենք այն քայլերը, որ պետք է իրականացնենք, որպեսզի ուղղենք այդ իրավիճակը: Ես պատրաստ եմ մանրամանս ներկայացնել և՛ մեր բոլոր վերլուծությունները, և՛ ամեն տարվա կատարված վերլուծությունները, կարող ենք մանրակրկիտ քննարկել: Մենք խնդիր չունենք, որ համարձակ չենք, որ չգնանատենք ու չբարձրաձայնենք, այն իրավիճակը, որում հիմա կանք»: